ტელეკომპანია "იბერია" ხელისუფლებას ადანაშაულებს დახურვის მცდელობაში

ტელეკომპანია „იბერიამ“ განაცხადა, რომ მუშაობის საგანგებო რეჟიმზე გადადის. “ტელევიზიის მუშაობა სერიოზული საფრთხის ქვეშაა. “იბერიას” ხელისუფლებამ გადაუკეტა დაფინანსების მთავარი წყარო. კომპანია „ომეგა ჯგუფი,“ რომლის შემადგენლობაშიც შედის ტელეკომპანია “იბერია,” პარალიზებულია. ხელისუფლებამ მიზანმიმართულად გააჩერა ფაბრიკა. ჟურნალისტებს გვაქვს ინფორმაცია, რომ მოხდა საგანგებოდ, რომ აღარ ისმოდეს ჩვენი ეთერიდან კრიტიკული აზრი. როგორც ჩანს, ხელისუფლების მიზანია, დაიხუროს ტელეკომპანია “იბერია” და ვეღარ შევძლოთ ჩვენი პროფესიული მოვალეობის განხორციელება“ - განაცხადა არხის საინფორმაციო სამსახურის უფროსმა, ვახტანგ ხუზმიაშვილმა. მისივე თქმით, აქვთ ინფორმაცია, რომ „ომეგა ჯგუფზე“ ხდება ზეწოლა, რათა ხელში ჩაიგდონ “იბერია.” ტელეკომპანიის ჟურნალისტები მოითხოვენ, „დაუყოვნებლივ შეწყდეს დარტყმა დამოუკიდებელ მედიაზე“ და მიეცეს მუშაობის საშუალება “ომეგა ჯგუფს.” მისმა დამფუნებელმა, ზაზა ოქუაშვილმა „იბერიის“ ეთერში დღეს განაცხადა, რომ „ომეგა ჯგუფზე“ ზემოქმედებენ „ფინანსური ბერკეტები, სასამართლო, სამართალდამცავები და ეს მთელი პირამიდა.“ 

“იბერია” და მისი მფლობელი „ომეგა ჯგუფი,“ რომლის შემოსავლის ძირითადი წყარო თამბაქოს რეალიზაციაა, ზეწოლის და ფინანსური პრობლემების შესახებ აცხადებდნენ 2018 წლის თებერვალშიც. მაშინ საუბარი იყო „ომეგა ჯგუფის“ სასამართლო დავაზე „British American Tobacco“-სთან და ამ კომპანიის დემპინგის შედეგად მიღებულ 100 მილიონიან ზარალზე.