ზუგდიდის 105-ე უბანზე დაპირისპირება მოჰყვა ორი ამომრჩევლის გამოჩენას

გაერთიანებული ოპოზიციის შტაბის წარმომადგენელთა ინფორმაციით, ზუგდიდში, 105-ე საარჩევნო უბანზე ორი ამომრჩეველი პოლიციამ გაურკვეველი მიმართულებით წაიყვანა. შს სამინისტროს წარმომადგენლების განცხადებით, ეს ადამიანები დაკავებულები არ არიან.

ოპოზიციის ინფორმაციით, ორმა მამაკაცმა, რომლებიც პოლიციამ წაიყვანა, ხმა მისცეს 105-ე უბანზე, თუმცა, როდესაც ერთ-ერთმა დამკვირვებელმა მათ ვინაობა ჰკითხა და პირადობის დამადასტურებელი მოწმობა  მოსთხოვა, პოლიციამ ისინი წაიყვანა. უბანზე კომისიის დამკვირვებლის ქეთევან ჯოლოხავას განცხადებით, ხმაური ამომრჩევლების სიაში გადამოწმებამ გამოიწვია: „ამ უბანში თითქმის ყველას ვიცნობ, მაგრამ დღის განმავლობაში უცნობი ადამიანები მოდიოდნენ. მათ ვამოწმებდით საარჩევნო სიებში.  ამჯერადაც, ეს ორი ადამიანი გადავამოწმეთ, რაზეც ოპოზიციის წარმომადგენლებმა ხმაური ატეხეს“, - განცხადა ქეთევან ჯოლოხავამ. თავის მხრივ, ადგილზე ვითარების გასაცნობად მისულმა ზუგდიდის მაჟორიტარმა დეპუტატმა მერაბ ქვარაიამ აღნიშნა, რომ მისი ინფორმაციით, არავინ დაუკავებიათ. პარლამენტარის განმარტებით, უბანზე მივიდა ორი მოქალაქე. კომისიის ზოგიერთი წევრი დაეჭვდა, ამიტომ იდენტიფიცირებისთვის მათ პირადობის მოწმობები მოსთხოვეს, რასაც ხმაური მოჰყვა.

შს სამინისტროს წარმომადგენლების განცხადებით, დაკავებული არავინ არ არის: „კონკრეტული გარემოების შესწავლის მიზნით, ნებაყოფლობით გადავიყვანეთ ხსენებული პირები განყოფილებაში, ამ ეტაპზე, ისინი უკვე წასულები არიან“.