ევროპაში ბუნებრივი აირის ფასი კვლავ ისტორიულ მაქსიმუმამდე გაიზარდა
ევროპაში შემოდგომიდან დაიწყო გაზის ფასების ზრდა, რაც მანამდე 100 კუბურ მეტრზე $170–220-ის ფარგლებში მერყეობდა. ამჟამად ევროპაში მთელი რიგი პრობლემები ართულებს მდგომარეობას ამ სფეროში. მათ შორისაა, ქარის ენერგიის მოსალოდნელზე უფრო დაბალი წარმოება და კვლავ გახსნილი ეკონომიკების მკვეთრად მზარდი მოთხოვნილება ენერგომატარებლებზე.
სიტუაციას ართულებს ასევე რუსეთისა და გერმანიის დამაკავშირებელი გაზსადენის - „ჩრდილოეთის ნაკადი 2“-ის ამოქმედებასთან დაკავშირებული გაურკვევლობა.
ავსტრიის ახალმა კანცლერმა კარლ ნეჰამერმა განაცხადა, რომ რუსეთ-უკრაინის საზღვარზე შექმნილი ვითარების გამო „ჩრდილოეთის ნაკადი 2“-ის წინააღმდეგ სანქციების დაწესება ზიანს მოუტანს ევროკავშირს. ამის შესახებ მან Die Welt-ისთვის მიცემულ ინტერვიუში ილაპარაკა.
კანცლერი გამოვიდა მოწოდებით, დაიწყოს გაზსადენის ექსპლუატაცია, როგორც ეს დაგეგმილი იყო, ვინაიდან ევროკავშირის ქვეყნებს გაზი და ნავთობი სჭირდებათ. მისი თქმით, აუცილებელია ენერგომომარაგება რაც შეიძლება დიდი რაოდენობის წყაროებიდან.
მანამდე აშშ-ის ხელისუფლებამ გერმანიას მოუწოდა, უარი თქვას „ჩრდილოეთის ნაკადი 2“-ზე, თუკი რუსეთი უკრაინაში შეიჭრება.
გაზსადენი ბალტიის ზღვის გავლით მიაწვდის ბუნებრივ აირს პირდაპირ გერმანიას და ევროკავშირს, უკრაინისთვის გვერდის ავლით.
გაზსადენის მშენებლობა უკვე დასრულებულია, მაგრამ ის არ არის სერტიფიცირებული. გერმანიის საგარეო საქმეთა მინისტრმა ანალენა ბერბოკმა 12 დეკემბერს ეს იმით ახსნა, რომ პროექტი არ უპასუხებს ევროპის სამართლებრივ ნორმებს, ამიტომ ჯერჯერობით არ შეიძლება მისი გაშვება. ბერბოკის განცხადების შემდეგ ევროპაში ათასი კუბური მეტრი ბუნებრივი აირის ფასმა პირველად გადააჭარბა 1400 დოლარს.