ალექსანდრე დარახველიძე ამბობს, რომ „წყლის ჭავლში, შესაძლოა, რაღაც იყო გარეული“

შს მინისტრის მოადგილე, ალექსანდრე დარახველიძე არ უარყოფს, რომ წყლის ჭავლში, რომლითაც პოლიცია ბოლო ორი დღის განმავლობაში აქციაზე დემონსტრანტებს შლიდა, წყლის გარდა, იყო კიდევ გარეული სხვა ნივთიერებაც.


რადიო თავისუფლების კითხვაზე, კონკრეტულად რა სპეციალური საშუალებები გამოიყენა პოლიციამ დემონსტრანტების წინააღმდეგ და რა იყო გარეული წყლის ჭავლში, ალექსანდრე დარახველიძის პასუხი იყო, რომ:


„საჭიროების შემთხვევაში, შესაძლებელია, წყლის ჭავლში იყოს გარეული შესაბამისი ნივთიერებები, გაზი იქნება თუ სხვა რამ“.


მისი სიტყვებით, პოლიციას აქვს კანონით მინიჭებული უფლება - გამოიყენოს იძულებითი ღონისძიებები და მათ შორის როგორც პასიური, ისე აქტიური სპეციალური საშუალებები - წყლის ჭავლი, გაზი, წიწაკის სპრეი და სხვა:


„ამას ვიყენებთ კანონის შესაბამისად. მთავარი ტესტი არის პროპორციულობა და მას ვიყენებთ საფრთხიდან გამომდინარე და რაც აუცილებელია მოსალოდნელი ზიანის აღსაკვეთად. ამ შემთხვევაში გამოყენებული იყო წყლის ჭავლი, წიწაკის სპრეი და სხვა საშუალებები, თუმცა ყველა საშუალებაზე კონკრეტულად ინფორმაციას ვერ მოგაწვდით, რადგან ეს პროცესი გრძელდებოდა ხანგრძლივად და 12 საათის მანძილზე ვიყავით მობილიზებული და ვიყენებდით კანონით დადგენილ საშუალებებს“, - განაცხადა ალექსანდრე დარახველიძემ.


მისივე განცხადებით, პოლიცია ძალას იყენებს იმ შემთხვევაში, როცა „მშვიდობიანი აქცია ხდება ძალადობრივი“.


„პროტესტის გამომხატველთა ქმედებები არაერთხელ გასცდა

შეკრება-მანიფესტაციის კანონით განსაზღვრულ ჩარჩოებს და გადაიზარდა

ძალადობრივ ქმედებებში. შესაბამისად, პოლიციის მხრიდან, კანონის

შესაბამისად განხორციელდა პარლამენტის შენობის მიმდებარე ქუჩების

გათავისუფლება მოძალადე ჯგუფებისგან“, - განაცხადა ალექსანდრე დარახველიძემ.


შს მინისტრის მოადგილის მონაცემებით, გასულ ღამეს პოლიციის მიერ დაკავებულია 107 ადამიანი. მისივე სიტყვებით, აქციებზე დაშავდა შინაგან საქმეთა სამინისტროს 42 თანამშრომელი.


„კიდევ ერთხელ ვაფრთხილებთ და მოვუწოდებთ აქციის მონაწილეებს, პროტესტი გამოხატონ კანონით დასაშვებ ფარგლებში, წინააღმდეგ შემთხვევაში, შინაგან საქმეთა სამინისტრო, სიტუაციის დეესკალაციის მიზნით, გაატარებს კანონით მინიჭებულ ყველა ღონისძიებას“, - განაცხადა ალექსანდრე დარახველიძემ.


კითხვაზე, დაიწყება თუ არა სამართლებრივი რეაგირება იმ პოლიციელების მიმართ, ვინც ძალას გადაამეტა, ალექსანდრე დარახველიძემ თქვა, რომ ეს არის სპეციალური საგამოძიებო სამსახურის საქმე.


„ეს ფაქტები, რაც ვნახეთ, იყო საკმაოდ მძიმე. ჩვენი მხრიდანაც ეს იქნება შეფასებული. ცხადია, ეს არ არის კარგი პრაქტიკა და თუ ის შეიცავს დანაშაულის ნიშნებს და ალბათ, შეიცავს, უნდა იყოს გამოძიებული“.


28-29-30 ნოემბერს გამართულ პროევროპულ აქციებზე პოლიციამ, ჯამში, 150 ადამიანი დააკავა. ადვოკატების განცხადებით, მათი უმრავლესობა ნაცემია.


ათასობით დემონსტრანტი რუსთაველის გამზირზე პარლამენტის წინ 28 ნოემბრიდან აპროტესტებს მთავრობის გადაწყვეტილებას, 2028 წლის ბოლომდე დღის წესრიგში არ დააყენონ ევროკავშირში გაწევრების მოლაპარაკების გახსნის საკითხი.