პია კაუმას წერილით მიმართავს “კოალიცია ცვლილებისთვის“, „ერთიანობა - ნაციონალური მოძრაობა“ და „ძლიერი საქართველო“
ეუთოს საპარლამენტო ასამბლეის პრეზიდენტის, პია კაუმასადმი მიწერილ წერილში სამი ოპოზიციური პოლიტიკური გაერთიანება წერს, რომ მისი ვიზიტი საქართველოში მიზანშეწონილად მხოლოდ იმ შემთხვევაში ჩაითვლება, „თუ ის ხელს შეუწყობს ახალი არჩევნების მოსამზადებელ პროცესებსა და პოლიტიკური პატიმრების გათავისუფლებას“, რადგან, როგორც პოლიტიკური პარტიები შენიშნავენ, „ქართული ოცნების“ „თვითმარქვია რეჟიმი არ განიხილავს არც პოლიტპატიმრების გათავისუფლებას და არც ახალი არჩევნების ჩატარებას“.
ოპოზიციური პოლიტიკური ძალები პია კაუმასადმი დაწერილ წერილში აღნიშნავენ, რომ ამ პირობებში ვიზიტის გადადება იქნებოდა საუკეთესო გადაწყვეტილება.
ისინი მადლობას უხდიან ეუთოს საპარლამენტო ასამბლეას და ODIHR-ს თავისუფალი, სამართლიანი და გამჭვირვალე არჩევნების უზრუნველყოფისადმი გამოჩენილი უწყვეტი ერთგულებისთვის, თუმცა იქვე შენიშნავენ, რომ 2024 წლის 26 ოქტომბრის საპარლამენტო არჩევნები ჩატარდა კონსტიტუციური და საერთაშორისო დემოკრატიული პრინციპების უხეში დარღვევით.
„ფალსიფიკაციის მასშტაბმა და ინტენსივობამ ძირი გამოუთხარა საარჩევნო პროცესის ლეგიტიმურობას და საზოგადოებრივ ნდობას. შედეგად, დღეს მხოლოდ „ქართული ოცნების“ დეპუტატებით დაკომპლექტებული „პარლამენტი“ და მისი მიერ არჩეული „პრეზიდენტი“ ვერ ჩაითვლება ლეგიტიმურად და ვერ გამოხატავს ქართველი ხალხის ნებას.
ბოლო პერიოდში საქართველოში მიმდინარე მშვიდობიანი პროტესტების მონაწილეთა მიმართ განხორციელდა უკანონო დაკავებები, ძალადობა და რეპრესიები. დღეს 50-ზე მეტი ადამიანი რჩება ციხეში, ასობით კი ადმინისტრაციული ბრალდებების წინაშე დგას“ - წერია პოლიტიკური პარტიების ერთობლივ განცხადებაში.
ისინი ასევე მიუთითებენ, რომ ივანიშვილის რეჟიმის მიზანი დღეს საერთაშორისო აღიარების მოპოვებაა, მაგრამ მათი განცხადებით, მსგავსი ვიზიტები ხშირად გამოიყენება მათ მიერ პროპაგანდისტული მიზნებისთვის, რაც კიდევ უფრო ართულებს დემოკრატიული ძალებისა და სამოქალაქო საზოგადოების მდგომარეობას.
ეუთოს საპარლამენტო ასამბლეის (OSCE PA) პრეზიდენტის, პია კაუმას საქართველოში დაგეგმილ ვიზიტს „კატასტროფული და ცუდ დროს შერჩეული გადაწყვეტილება“ უწოდა ლატვიელმა ევროპარლამენტარმა რიჰარდს კოლსმა, რომელმაც თავისი მოსაზრება სოციალურ პლატფორმა X-ზე გამოაქვეყნა.
მოგვიანებით კი პია კაუმას მოსალოდნელ ვიზიტს საქართველოში კრიტიკულად არაერთი სხვა დასავლელი პოლტიკოსიც გამოეხმაურა.