შეფერხების შემდეგ, ღაზაში ამოქმედდა ცეცხლის შეწყვეტის შეთანხმება
სააგენტო როიტერსი ადგილობრივი მოსახლეების და ერთი მედიკოსის სიტყვებზე დაყრდნობით წერს, რომ შეთანხმების ამოქმედებამდე ნახევარი საათით ადრე აღარ ისმოდა ბრძოლის ან სამხედრო თავდასხმების ხმა.
მანამდე, როცა შეთანხმება უკვე უნდა ამოქმედებულიყო - კვირას, ადგილობრივი დროით დაახლოებით დილის 11 საათამდე - ისრაელის საჰაერო და საარტილერიო თავდასხმებს კიდევ 13 პალესტინელი ემსხვერპლა.
შეთანხმების ამოქმედების გაჭიანურებაში ისრაელმა ჰამასს დასდო ბრალი - რადგან აშშ-ის და ევროკავშირის მიერ ტერორისტულ ორგანიზაციად აღიარებულმა ამ ორგანიზაციამ დროულად ვერ წარმოადგინა იმ პირველი სამი მძევლის სახელები, რომლებიც, შეთანხმების პირობებით, მან უნდა გაათავისუფლოს.
ჰამასმა გაჭიანურება ტექნიკური მიზეზებით ახსნა, დაკონკრეტების გარეშე.
დაწესებული ვადიდან ორი საათის გასვლის შემდეგ ჰამასმა გამოაცხადა, რომ სია გაგზავნა - რაც შემდეგ ისრაელის წარმომადგენლებმა დაადასტურეს. ჰამასის თანახმად, კვირას, 19 იანვარს ის გაათავისუფლებს სამ მძევალს - რომი გონენს, დორონ შტეინბრეხერს და ემილი დამარის.
ცეცხლის შეწყვეტის შეთანხმებამ შესაძლოა გზა გაუხსნას ღაზაში ომის დასრულებას. ომი დაიწყო მას შემდეგ, რაც ჰამასმა - რომელიც ამ პატარა ზომის სანაპირო ტერიტორიას აკონტროლებს - 2023 წლის 7 ოქტომბერს ისრაელზე მიიტანა იერიში. ისრაელის მონაცემებით, ამ დღეს დახოცეს 1200 ადამიანი და დაატყვევეს 250-ზე მეტი პირი.
მას მერე, პალესტინელთა ჯანდაცვის უწყების თანახმად, ისრაელის ძალებმა ღაზაში იმსხვერპლეს 47 000-მდე პალესტინელი.
ომმა ასევე გაამწვავა კონფრონტაცია ისრაელსა და მის მეტოქე სახელმწიფოს, ირანს შორის - რომელიც მხარს უჭერს ჰამასს და რეგიონში მოქმედ, ისრაელისა და აშშ-ის მოწინააღმდეგე სხვა გასამხედროებულ დაჯგუფებებს.