ჰამასი პალესტინელი პატიმრების სანაცვლოდ კიდევ ოთხ მძევალს გაუშვებს

ჰამასის ოფიციალურმა წარმომადგენელმა სააგენტო AFP-ს განუცხადა, რომ მომავალ შაბათს კიდევ ოთხ ისრაელელ მძევალს გაუშვებენ.

ტაჰერ ალ-ნუნუს თქმით, მათ გაათავისუფლებენ ისრაელის ციხეებში მყოფი პალესტინელების სანაცვლოდ, როგორც ამას ცეცხლის შეწყვეტის შეთანხმება ითვალისწინებს.

ღაზის სექტორში საომარი მოქმედებების დასრულების შეთანხმების ფარგლებში, ისრაელმა საპატიმროდან პირველ ეტაპზე გაათავისუფლა 90 პალესტინელი პატიმარი. ამას წინ უძღოდა ჰამასის (აშშ-სა და ევროკავშირის მიერ აღიარებულია ტერორისტულ დაჯგუფებად.) მიერ სამი მძევლის გათავისუფლება და გადაცემა ისრაელისთვის.

2023 წლის 7 ოქტომბერს ჰამასის თავდასხმისას ისრაელზე, რასაც 1200 პირი ემსხვერპლა, მძევლად 250 ადამიანი აიყვანეს. მათი მცირე ნაწილი მალევე გაათავისუფლეს, ნაწილი დაიღუპა.

ამ თავდასხმას მოჰყვა ისრაელის საჰაერო და სამხედრო იერიში ღაზის სექტორზე, რის შედეგადაც 47 ათასამდე პალესტინელი დაიღუპა.

საომარი მოქმედებების და ბლოკადის გამო სამოქალაქო მოსახლეობა ჰუმანიტარულ კატასტროფაში აღმოჩნდა. გაეროს მონაცემებით, ღაზის სექტორში დანგრეული ან დაზიანებულია სახლების 92%.

2024 წლის ნოემბერში სისხლის სამართლის საერთაშორისო სასამართლომ გასცა ისრაელის პრემიერ-მინისტრის, ბენიამინ ნეთანიაჰუს, თავდაცვის ყოფილი მინისტრის, იოავ გალანტისა და ჰამასის ერთ-ერთი ლიდერის, მოჰამედ დეიფის დაპატიმრების ორდერები.

ისინი ეჭვმიტანილი არიან ომის დანაშაულისა და კაცობრიობის წინააღმდეგ დანაშაულის ჩადენაში.