დავოსში მუშაობა დაიწყო მსოფლიო ეკონომიკურმა ფორუმმა
ყოველწლიური მსოფლიო ეკონომიკური ფორუმის ორგანიზატორებმა შვეიცარიის კურორტ დავოსში 3 000 სტუმარი, მათ შორის 60 ქვეყნის ლიდერი მიიწვიეს.
სულ ფორუმზე 130 ქვეყნის წარმომადგენლები ჩავიდნენ.
ეკონომიკური ფორუმის ძირითადი თემა “ინტელექტის ეპოქაში” თანამშრომლობაა. ფორუმის მონაწილეები უპასუხებენ შეკითხვას: როგორ მოექცეს მსოფლიო ხელოვნურ ინტელექტს?
ამას გარდა, დავოსის ფორუმის მონაწილეები მსჯელობენ კლიმატის დაცვაზე, გეოპოლიტიკურ კრიზისებსა და კიბერდამნაშავეობაზე.
შეხვედრის მონაწილეებს შორის არიან ევროკომისიის პრეზიდენტი ურზულა ფონ დერ ლაიენი, უკრაინის პრეზიდენტი ვოლოდიმირ ზელენსკი, გერმანიის კანცლერი ოლაფ შოლცი, ასევე ისრაელის პრეზიდენტი იცხაკ ჰერცოგი.
აშშ-ის პრეზიდენტი დონალდ ტრამპი, რომლის ინაუგურაცია 20 იანვარს გაიმართა, ვიდეოხიდის საშუალებით მიმართავს ფორუმის მონაწილეებს. ტრამპმა ინაუგურაციაზე გამოსვლისას თქვა, რომ აშშ ტარიფებს და გადასახადებს დაუწესებს უცხოეთის სახელმწიფოებს.
ფონ დერ ლაიენმა განაცხადა, რომ „აუცილებელია ერთად მუშაობა, რათა თავიდან ავიცილოთ მსოფლიო შეჯიბრება ფსკერზე“ და გამოთქვა სურვილი, „დამყარდეს ახლებური პარტნიორული ურთიერთობა“.
ფონ დერ ლაინემა დავოსში თქვა, რომ საჭიროა ევროკავშირის კონსტრუქციული ურთიერთქმედება ჩინეთთან. დავოსში იმყოფება ჩინეთის მაღალი რანგის წარმომადგენელი.
მოელიან, რომ უკრაინის პრეზიდენტი, რომელიც ყურადღებით ელის, რას მოიმოქმედებს ტრამპი, დავოსში მიმართავს მსოფლიო ლიდერებს და კომპანიების ხელმძღვანელებს, არ შეწყვიტონ და უფრო გააძლიერონ უკრაინის დახმარება რუსეთთან ბრძოლაში.
დავოსში გამოსვლისას საუდის არაბეთის სანავთობო გოლიათის, Aramco-ს ხელმძღვანელმა ამინ ნასერმა განაცხადა, რომ ნავთობის ბაზარს მიიჩნევს ჯანსაღად და მოელის, რომ წელს ნავთობის დღიური მოპოვება გაიზრდება 1,3 მილიონი ბარელით. Reuters-ის თანახმად, ნასერმა ეს განაცხადა იმ შეკითხვაზე პასუხად, რომელიც შეეხებოდა დონალდ ტრამპის გადაწყვეტილებას წიაღისეული საწვავის მოპოვების ზრდაზე.
კურორტს რეგიონულ პოლიციასთან ერთად იცავს არმიის 5 000 მოსამსახურე.