ჰამასმა დაასახელა ოთხი ისრაელელი ქალი-ჯარისკაცის ვინაობა, რომლებსაც გაათავისუფლებს

პალესტინელთა ორგანიზაცია ჰამასმა (აშშ-ში და ევროკავშირში ტერორისტულად შერაცხილი) გამოაცხადა იმ ოთხი პირის ვინაობა, რომლებსაც გაათავისუფლებს პალესტინელ პატიმრებზე გაცვლის შესახებ შეთანხმების ჩარჩოში.


საქმე ეხება ოთხ ისრაელელ ქალ-ჯარისკაცს - კარინა არიევს, დანიელა გილბოას, ნაამა ლევის და ლირი ალბაგს, განაცხადა ჰამასმა, რომელიც ისრაელელ მძევლებს ეტაპობრივად ათავისუფლებს ღაზაში ცეცხლის შეწყვეტის შესახებ შეთანხმების პირობების თანახმად.


გაცვლის პროცედურა დაიწყება 25 იანვარს, დღის მეორე ნახევარში. გასულ კვირას 90 პალესტინელი პატიმარი გაცვალეს სამ ისრაელელ მძევალზე. ოფიციალური პირების თანახმად, როგორც Reuters-ის სააგენტო იტყობინება, ღაზაში ცეცხლის შეწყვეტის პირველი ექვსკვირიანი ეტაპის განმავლობაში ისრაელი დათანხმდა, გამოუშვას 50 პალესტინელი პატიმარი ერთი ისრაელელი ჯარისკაცი ქალის სანაცვლოდ.


ეს ნიშნავს, რომ ამ ოთხის სანაცვლოდ 200 პალესტინელ პატიმარს გაათავისუფლებენ. კვირას სამი ქალის გათავისუფლების და ათი წლის განმავლობაში დაკარგული ისრაელელი ჯარისკაცის გვამის ნახვის შემდეგ, ისრაელი ამტკიცებს, რომ ღაზაში რჩება 94 ისრაელელი და უცხოელი მძევალი.


ღაზის სექტორში მიღწეული ცეცხლის შეწყვეტის შესახებ შეთანხმებით, რომელიც კატარის და ეგვიპტის, ასევე აშშ-ის შუამავლობით იქნა მიღწეული, დასრულდა საომარი მოქმედებები. პირველ ეტაპზე ჰამასმა გაუშვა 33 მძევალი ასეულობით პალესტინელის გათავისუფლების სანაცვლოდ.


ომი დაიწყო მას შემდეგ, რაც ჰამასმა - რომელიც ამ პატარა ზომის სანაპირო ტერიტორიას აკონტროლებს - 2023 წლის 7 ოქტომბერს ისრაელზე მიიტანა იერიში. ისრაელის მონაცემებით, ამ დღეს დახოცეს 1200 ადამიანი და დაატყვევეს 250-ზე მეტი პირი. მას მერე, პალესტინელთა ჯანდაცვის უწყების თანახმად, ისრაელის ძალებმა ღაზაში იმსხვერპლეს 47 000-მდე პალესტინელი.