კიევი, ოდესა, ხარკოვი - უკრაინაზე ისევ დრონებით შეტევა იყო

რუსეთის ჯარებმა უკრაინის რეგიონებზე დრონებით მორიგი შეტევა მიიტანეს. არიან დაშავებულები. დაზიანებულია სამოქალაქო ინფრასტრუქტურის ობიექტები.


ოდესის ადგილობრივი ხელისუფლების ინფორმაციით, 28 იანვარს, შუაღამის შემდეგ დაწყებული შეტევის შედეგად, ქალაქ ოდესასა და ოდესის რაიონში ოთხი ადამიანი დაშავდა. დაზიანებულია რამდენიმე სახლი და ხორბლის საცავი. საოლქო-სამხედრო ადმინისტრაციის ცნობით, უკრაინის საჰაერო თავდაცვის ძალებმა ოდესის რაიონში ერთი რუსული რაკეტაც მოიგერიეს.


ორი კერძო სახლის ნაწილობრივ დანგრევის შესახებ იუწყება ჩერნიგოვის ოლქის ხელისუფლება.


კიევის ოლქის სამხედრო ადმინისტრაციის ინფორმაციით, რუსული დრონების ნამსხვრევებმა დააზიანეს ორი სახლი და კიდევ რამდენიმე შენობა, მათ შორის რეტრო-ავტომობილების მუზეუმი, სადაც განადგურებული და დაზიანებულია 36 ავტომანქანა.


რუსული დრონებით შეტევამ მასშტაბური ხანძარი გამოიწვია ქალაქ ხარკოვის ერთ-ერთ საწარმოში. ადგილობრივი ხელისუფლების ინფორმაციით, დაშავდა ორი ადამიანი.




უკრაინის საჰაერო ძალების სარდლობის მიერ დილით გამოქვეყნებული მონაცემებით, ღამის განმავლობაში რუსეთის საოკუპაციო ძალებმა უკრაინას შეუტიეს 100 უპილოტო საფრენი აპარატით, რომელთაგან 65 გაანადგურეს, 28 კი „ლოკალურად დაიკარგა ნეგატიური შედეგების გარეშე".


სარდლობის ინფორმაციით, ოდესის, კიევის, ხარკოვის, სუმის, პოლტავის, ჩერნიგოვოს და ჩერკასის ოლქებში დაზიანებულია სახლები, კერძო საწარმოების შენობები და ავტოტრანსპორტი.