ევროკავშირი აპირებს, აკრძალოს რუსეთში სათამაშო კონსოლების გაყიდვა

ევროკავშირი აპირებს, აკრძალოს რუსეთში ისეთი სათამაშო კონსოლების ექსპორტი, როგორებიცაა Xbox და PlayStation. The Financial Times-ის თანახმად, შეზღუდვები შეიძლება შევიდეს სანქციების ახალ პაკეტში, რომელიც უკრაინაში რუსეთის სრულმასშტაბიანი შეჭრის წლისთავს ეძღვნება.

გაზეთი იმოწმებს ევროპის კავშირის უმაღლეს წარმომადგენელს საგარეო პოლიტიკისა და უსაფრთხოების საკითხებში, კაია კალასს. მისი სიტყვებით, ვიდეოთამაშების კონსოლები, „როგორც ჩანს“, რუსეთის არმიის მიერ დრონების სამართავად გამოიყენება.

სათამაშო კონსოლების სამმა უდიდესმა მწარმოებელმა: ამერიკულმა კომპანია Microsoft-მა და იაპონურმა კონცერნებმა Nintendo-მ და Sony-მ რუსეთში პირდაპირი გაყიდვები 2022 წლის მარტის დამდეგს შეწყვიტეს. ევროკავშირის შეზღუდვები მიმართული იქნება იმ მოვაჭრეთა წინააღმდეგ, რომლებიც კონსოლებს აგზავნიან რუსეთში. მათ შორის იქნება ნახმარი მოწყობილობებით მოვაჭრეებიც, წერს FT.

თავად ევროკავშირი სათამაშო კონსოლებს არ აწარმოებს. უპილოტო საფრენი აპარატები კონსოლებით არ იმართება, მაგრამ მართვის სისტემებში შეიძლება გამოყენებულ იქნეს სათამაშო კონსოლების ნაწილები - ჯოისტიკები და ვირტუალური სათვალეები, რომლებიც ძირითადად ჩინეთშია ნაწარმოები.

M. Video-Eldorado-ს ცნობით, 2024 წლის ცხრა თვის განმავლობაში რუსეთის მოქალაქეებმა 1,07 მილიონი კონსოლი იყიდეს 22,3 მილიარდი რუბლის საერთო ღირებულებით (227 მილიონი აშშ დოლარი).