უკრაინის საჰაერო ძალები: სუმისა და სხვა ოლქებზე შეტევაში 80-ზე მეტი დრონი მონაწილეობდა
უკრაინაზე მორიგი შეტევისას, რომელიც 29 იანვრის ღამიდან მიმდინარეობდა, რუსეთის საოკუპაციო ძალებმა 81 უპილოტო საფრენი აპარატი გამოიყენეს. ეს ინფორმაცია დღეს, 30 იანვარს, ადგილობრივი დროით 11:30 საათისთვის გამოაქვეყნა უკრაინის საჰაერო ძალების სარდლობამ.
სარდლობის თანახმად, უკრაინის თავდაცვის ძალებმა 37 დრონი ჩამოაგდეს, 39 კი „ლოკალურად დაიკარგა ნეგატიური შედეგების გარეშე".
დრონით დარტყმის შედეგად ქალაქ სუმიში ნაწილობრივ დაინგრა მრავალსართულიანი სახლი, სადაც, სულ მცირე, ოთხი ადამიანი დაიღუპა.
უკრაინის პრეზიდენტმა ვოლოდიმირ ზელენსკიმ მომხდარს ტრაგედია და დანაშაული უწოდა და მოკავშირეებს მოუწოდა, რუსეთზე ზეწოლის პროცესში პაუზა არ დაუშვან.
უკრაინის საჰაერო ძალების სარდლობის მონაცემებით, რუსული დრონებით შეტევის შედეგად სახლები და საწარმოები დაზიანდა ჩერნიგოვის, ოდესისა და პოლტავის ოლქებშიც.
უკრაინის ამ რეგიონებიდან მსხვერპლის შესახებ ცნობები არ გავრცელებულა.