რუსეთის აგრესიის გამოსაძიებლად ტრიბუნალი გაზაფხულისთვის შეიქმნება ევროპის საბჭოს ჩარჩოებში
უკრაინის წინააღმდეგ აგრესიის დანაშაულისთვის საგანგებო ტრიბუნალის შექმნის ძირითად ჯგუფში შედის 41 სახელმწიფო, ევროკომისია, ევროპის საგარეო პოლიტიკის სამსახური და თავად ევროსაბჭო.
რადიოსადგურ “გერმანული ტალღის” (DW) წყაროების მონაცემებით, ტრიბუნალის ინიციატორების ეს შეხვედრა შეიძლება გახდეს ბოლოს წინა, შემდეგი შეხვედრა კი შესაძლოა, გაზაფხულზე გაიმართოს. ამ შეხვედრაზე, დიდი ალბათობით, ხელს მოაწერენ დოკუმენტს საგანგებო ტრიბუნალის შექმნის შესახებ.
აგრესიის დანაშაულისთვის, რომელსაც ერთ-ერთ უმძიმეს დანაშაულს უწოდებენ, აგრესორი სახელმწიფოს ლიდერები და მისი სამხედრო ხელმძღვანელობა სასჯელს ექვემდებარებიან.
“გერმანული ტალღის” კითხვის საპასუხოდ, თუ რა გავლენა შეიძლება მოახდინოს საერთაშორისო ტრიბუნალის შექმნამ პოტენციურ მოლაპარაკებაზე, რომლის გამართვასაც აპირებს აშშ-ის პრეზიდენტი დონალდ ტრამპი რუსეთის პრეზიდენტ ვლადიმირ პუტინთან, ევროკავშირის საგარეო პოლიტიკურმა ხელმძღვანელმა კაია კალასმა განაცხადა: "ეჭვგარეშეა, რომ პუტინმა ჩაიდინა აგრესიის დანაშაული, ანუ მან გადაწყვიტა სხვა ქვეყანაზე თავდასხმა, უკრაინის სუვერენიტეტისა და ტერიტორიული მთლიანობის ხელყოფა". DW-სთან ინტერვიუში კალასმა ასევე განაცხადა, რომ ტრიბუნალის მუშაობა აუცილებელია "დამნაშავეების პასუხისგებაში მისაცემად და უკრაინაში სამართლიანი მშვიდობის დასამყარებლად."