CIT: 2024 წელს უკრაინასა და რუსეთში დაბომბვებს ემსხვერპლა 2600 მშვიდობიანი მოქალაქე
ასეთ მონაცემებს შეიცავს ანგარიში "სამოქალაქო მსხვერპლი დაბომბვის შედეგად 2024 წელს", რომელიც საგამოძიებო ჯგუფის „კონფლიქტის დაზვერვის გუნდის“ (CIT) მიერ მომზადდა.
ეს გამოთვლები ეფუძნება ჯგუფის მოხალისეების მიერ სამოქალაქო ინფრასტრუქტურის დაბომბვის შესახებ შეგროვებულ მონაცემებს.
CIT-ი ხაზს უსვამს, რომ ინფორმაციის შეგროვებისას იგი ძირითადად ეყრდნობა ოფიციალური პირების განცხადებებს და დადასტურებულ ღია მონაცემებს.
დაღუპულთა ნახევარზე მეტი - 1915 ადამიანი, მათ შორის 81 ბავშვი - დაიღუპა უკრაინის ხელისუფლების მიერ კონტროლირებად ტერიტორიაზე დაბომბვის შედეგად.
რუსეთის მიერ კონტროლირებად უკრაინის ტერიტორიაზე კი 452 ადამიანია დაღუპული, მათ შორის 20 ბავშვი.
მოხალისეების ინფორმაციით, რუსეთის ტერიტორიაზე დაბომბვაას ემსხვერპლა 233 ადამიანი. მათ შორის 14 ბავშვია.
რაც შეეხება დაჭრილებს და დაშავებულებს, 2024 წელს, რუსეთის ტერიტორიაზე დაშავდა 1600-ზე მეტი ადამიანი, ხოლო უკრაინის ტერიტორიაზე 12 500-ზე მეტი.
ვინაიდან მოხალისეებმა ინფორმაციის შეგროვება მხოლოდ 2023 წლის ბოლოს დაიწყეს, შეუძლებელია ამ მაჩვენებლების შედარება ადრინდელ მონაცემებთან.
გაეროს ცნობით, უკრაინაში რუსეთის ფართომასშტაბიანი შეჭრის დაწყებიდან 12 000-ზე მეტი მშვიდობიანი მოქალაქე დაიღუპა, მაგრამ ეს მონაცემები, სავარაუდოდ, სრულყოფილი არ არის.
რუსეთში, 2024 წელს, უკრაინის დარტყმების შედეგად დაღუპულთა და დაჭრილთა უმეტესობა ბელგოროდის რეგიონის მაცხოვრებლები იყვნენ. უკრაინაში დაღუპულთა ყველაზე მეტი რაოდენობა კი დონეცკის, ხარკოვისა და ხერსონის რეგიონებშია, სადაც აქტიური სამხედრო ოპერაციები მიმდინარეობს.