სალომე ზურაბიშვილი მიუნხენში საფრანგეთის საგარეო საქმეთა მინისტრს შეხვდა
„პროდუქტიული საუბარი მქონდა მინისტრ ჟან-ნოელ ბაროსთან საქართველოში მიმდინარე უწყვეტი პროტესტის თაობაზე. განვიხილეთ დამატებით ნაბიჯებზე, რომლებიც შესაძლოა გადაიდგას როგორც ეროვნულ, ისე ევროკავშირის დონეზე. ხაზი გავუსვი საქართველოს სამოქალაქო საზოგადოების და თავისუფალი მედიის მხარდაჭერის აუცილებლობას“, - წერს სალომე ზურაბიშვილი პლატფორმა X-ზე.
14 თებერვალს, სალომე ზურაბიშვილმა მონაწილეობა მიიღო მიუნხენის უსაფრთხოების კონფერენციის პანელურ დისკუსიაში, "საქართველო ყურადღების ცენტრში". მან იქ განაცხადა, რომ დასავლეთის რეაქცია ბოლო დროს, საქართველოში განვითარებული პროცესების მიმართ "არასაკმარისია".
დისკუსიაზე, სალომე ზურაბიშვილმა ასევე ისაუბრა ანაკლიის ღრმაწყლოვანი პორტის პროექტზე, ნატოსა და ევროკავშირის შეწყვეტილ პროექტებზე საქართველოში და განაცხადა, რომ ის რაც საქართველოში ხდება, დასავლეთისთვის "მეტია, ვიდრე ქართული პოლიტიკა".
2025 წლის მიუნხენის უსაფრთხოების კონფერენციაში "ქართული ოცნების" მთავრობა არ მონაწილეობს.
კონფერენცია 14 თებერვალს გაიხსნა და 16 თებერვლამდე გაგრძელდება.