დონალდ ტრამპმა და ილონ მასკმა ერთობლივი ინტერვიუ მისცეს Fox News-ს
აშშ-ის პრეზიდენტმა დონალდ ტრამპმა და მილიარდერმა ილონ მასკმა, მთავრობის ეფექტიანობის დეპარტამენტის არაოფიციალურმა ხელმძღვანელმა, ერთობლივი ინტერვიუ მისცეს ტელეარხ (DOGE) Fox News-ს.
თითქმის ერთსაათიანი ინტერვიუ, რომელიც 18 თებერვალს გავიდა, ძირითადად მიეძღვნა მთავრობის ეფექტიანობის დეპარტამენტის (DOGE) საქმიანობას და როგორც მასკმა თქვა, „მისი მიზანი „ბიუროკრატიის შესუსტება და დემოკრატიის აღდგენაა“.
ტელეარხ Fox News-ის წამყვანმა შონ ჰანიტიმ ინტერვიუს დასაწყისში მასკი წარადგინა, როგორც ერთ-ერთი ყველაზე წარმატებული მეწარმე, ტრამპის ყველაზე ახლო მრჩეველი, დეპარტამენტის უფროსი, რომელიც ამზადებს რეკომენდაციებს სახელმწიფო აპარატის შემცირებისა და ოპტიმიზაციისთვის.
მასკმა თავისი როლი განსაზღვრა როგორც როლი მრჩევლისა, „რომელიც პრეზიდენტს ტექნოლოგიურ მხარდაჭერას უწევს“.
თვითონ ტრამპმა თქვა, რომ მასკის სახით მან შეიძინა „უჭკვიანესი ადამიანი", როგორც მრჩეველი, რომლის ჯგუფს შეუძლია შეასრულოს დასახული ამოცანა: გამოავლინოს და შეამციროს სახელმწიფო აპარატის გაუმართლებელი ხარჯები.
ტრამპი დარწმუნებულია, რომ DOGE გამოავლენს ფინანსების ბოროტად გამოყენების ასეულობით მილიარდი დოლარის მომცველ შემთხვევებს. დაზოგილი თანხა, რომელიც მთავრობის ეფექტიანობის დეპარტამენტის საქმიანობის შედეგად გამოვლინდება, პრეზიდენტ ტრამპის შეფასებით, ტრილიონ დოლარს მიაღწევს.
სააგენტო AP იტყობინება, რომ მასკი ოფიციალურად არ ხელმძღვანელობს DOGE-ს, მაგრამ აქვს პრეზიდენტის უფროსი მრჩევლის სტატუსი. შესაბამისად, მას, ფედერალური უწყებების სხვა ხელმძღვანელებისგან განსხვავებით, დასჭირდა სენატის დამტკიცება.
ინტერვიუს დროს დონალდ ტრამპმა და ილონ მასკმა უპასუხეს ოპონენტებს, რომლებიც პრეზიდენტ ტრამპს უფლებამოსილების გადაჭარბებაში ადანაშაულებენ, რადგან DOGE-ს მიენიჭა წამყვანი ფედერალური სააგენტოების ოფიციალურ დოკუმენტებზე წვდომის უფლება.
“ჩვენ ვცდილობთ იმ ხალხის ნება შევასრულოთ, რომელმაც დონალდ ტრამპი პრეზიდენტად აირჩია, - შევამციროთ ბიუროკრატია“.
დემოკრატიული პარტიის წარმომადგენლები და ტრამპის სხვა ოპონენტები აკრიტიკებენ DOGE-ის საქმიანობას და მასკს და მის გუნდს უფლებამოსილების გადაჭარბებაში ადანაშაულებენ, შესაბამისი ნებართვის გარეშე აშშ-ის მოქალაქეთა მონაცემების მოპოვების გამო.
ერთ-ერთი ყველაზე გახმაურებული გადაწყვეტილება, რომელიც მასკის დეპარტამენტმა მიიღო, ეხება აშშ-ის სააგენტო USAID-ის საქმიანობის ფაქტობრივ შეჩერებას.