შიკორსკის თქმით, თუ მასკის Starlink-ი უკრაინისთვის არასანდო გამოდგება, სხვა პროვაიდერი უნდა მოიძებნოს
„თუ SpaceX მომსახურების არასანდო მიმწოდებელი აღმოჩნდება, მაშინ ჩვენ სხვების მოძებნა მოგვიწევს,“ დაწერა შიკორსკიმ სოციალურ ქსელ X-ში.
მანამდე ილონ მასკმა X-ზე გამოაქვეყნა, რომ მისი სისტემა Starlink „უკრაინის არმიის ხერხემალია“. „მათი მთელი ფრონტის ხაზი ჩამოიშლება, თუ მას გამოვრთავ“, წერს მასკი, რომელიც აშშ-ის პრეზიდენტ დონალდ ტრამპთან ერთ-ერთ ყველაზე დაახლოებულ ადამიანად ითვლება. იმავე პოსტში მასკმა უკრაინის ომს უწოდა „ჩიხში მოქცეული მრავალწლიანი სასაკლაო“ და გამოთქვა მოსაზრება, რომ კიევს არ შეუძლია კონფლიქტში უპირატესობის მოპოვება. „ვინც ნამდვილად ზრუნავს, ფიქრობს და ესმის, იმას ენდომება, რომ ეს ხორცსაკეპი გაჩერდეს“, წერს მასკი და ტექსტს ამთავრებს სიტყვებით: „მშვიდობა ახლა!!“.
მოგვიანებით პოლონეთის საგარეო საქმეთა მინისტრმა რადოსლავ შიკორსკიმ დაწერა, რომ „უკრაინისთვის Starlink-ის მომსახურებას იხდის პოლონეთის დიგიტალიზაციის სამინისტრო“ და ეს წელიწადში დაახლოებით 50 მილიონ დოლარს შეადგენს. „აგრესიის მსხვერპლის მიმართ მუქარის ეთიკურობას რომ თავი დავანებოთ, თუ SpaceX არასანდო პროვაიდერი აღმოჩნდება, იძულებული ვიქნებით, სხვები ვეძებოთ“, წერს შიკორსკი X-ში.
2025 წლის თებერვალში ილონ მასკმა მცდარი უწოდა Reuters-ის მიერ წყაროებზე დაყრდნობით გავრცელებულ ინფორმაციას, რომ შეერთებულმა შტატებმა უკრაინას შეიძლება Starlink-ის სატელიტურ ინტერნეტზე წვდომა შეუწყვიტოს, თუკი ჩაიშლება მოლაპარაკებები ბუნებრივ რესურსებზე გარიგების შესახებ.