რუსეთი აცხადებს, რომ კურსკის ოლქში კიდევ სამი დასახლებული პუნქტი დაიკავა
მანამდე, 8 მარტიდან მოყოლებული, რუსეთის სამხედრო უწყებამ გაავრცელა ინფორმაცია, რომ რუსეთის არმიის კონტროლქვეშ გადავიდა კურსკის ოლქის სოფლები ლებედევკა, ვიქტოროვკა, ნიკოლაევკა და სტარაია სოროჩინა. გარდა ამისა, რუსეთის თავდაცვის სამინისტრომ გამოაქვეყნა ვიდეო, რომელშიც, სავარაუდოდ, უპილოტო საფრენი აპარატები ესხმიან თავს უკრაინის შეიარაღებული ძალების ნაწილების კოლონას. უწყების ცნობით, კოლონა უკან იხევდა ქალაქ სუჯიდან, რომელიც უკრაინის ჯარებმა 2024 წლის აგვისტოში დაიპყრეს.
როგორც BBC აღნიშნავს, მსგავსი ცნობები ადრე გამოაქვეყნეს რუსმა ომის მომხრე ბლოგერებმა. ისინი აცხადებდნენ, რომ შაბათს რუსმა სამხედროებმა კურსკის ოლქში წარმატებული ოპერაცია ჩაატარეს.
უკრაინის შეიარაღებულ ძალებში რუსი სამხედროების ინფორმაციაზე კომენტარს არ აკეთებენ. შაბათს საღამოს უკრაინის გენერალურმა შტაბმა დაადასტურა ინფორმაცია, რომ რუსეთის „დივერსიულ-მოიერიშე ჯგუფებმა“ რეგიონში გასამაგრებლად გამოიყენეს გაზსადენის განშტოება. ტელეგრამის შეტყობინებაში ნათქვამია, რომ რუსეთის ჯარები „დროულად იქნა აღმოჩენილი“ და რომ უკრაინამ რაკეტებითა და არტილერიით უპასუხა. „ამჟამად მიმდინარეობს რუსული სპეცრაზმის აღმოჩენა, ბლოკირება და განადგურება. სუჯაში მტრის დანაკარგები ძალიან დიდია“, აღნიშნა უკრაინის შეიარაღებული ძალების გენერალურმა შტაბმა კონკრეტული მონაცემების დასახელების გარეშე.
უკრაინამ კურსკის რეგიონში შეტევა დაიწყო 2024 წლის აგვისტოში. მაგრამ, როგორც ღია წყაროებში ხელმისაწვდომი რუკები მეტყველებს, რამდენიმეთვიანი ოპერაციის შემდეგ უკრაინელებს ალყაში მოხვედრის საფრთხე ემუქრებათ.
კიევი ამტკიცებდა, რომ კურსკის ოპერაცია უპირატესობისა და ტერიტორიის მოპოვებას ისახავდა მიზნად მომავალ სამშვიდობო მოლაპარაკებებში ტერიტორიების გადასაცვლელად, ასევე იმისთვის, რომ ეიძულებინა რუსეთი, აღმოსავლეთ უკრაინაში გამომფიტავ იერიშში მონაწილე ჯარები მოეხსნა და კურსკში გადაესროლა.