"საერთო საკოორდინაციო ფრონტი" და 31 მარტის აქცია - ზურაბიშვილი ოპოზიციონერებს შეხვდა
"ნაციონალური მოძრაობის" თავმჯდომარის, თინა ბოკუჩავას თქმით, მნიშვნელოვანია, რომ საკოორდინაციო ფრონტმა იმუშაოს, კონკრეტული მიზნებისთვის, იყოს ქმედითუნარიანი და მასში მონაწილეობა მიიღონ არა მხოლოდ პარტიებმა, ასევე, საზოგადოებრივმა ჯგუფებმაც.
"საკოორდინაციო ფრონტის შექმნა არის წინგადადგმული ნაბიჯი. რამდენად შედეგს გამოიღებს, ამას დრო გვიჩვენებს, ჩვენ ძალისხმევას არ დავაკლებთ... მნიშვნელოვანია, რომ ამ ფრონტმა იმუშაოს, კონკრეტული მიზნებისთვის, შეიქმნას დროულად, იყოს ქმედითუნარიანი, მასში მონაწილეობა მიიღოს არა მხოლოდ პოლიტიკურმა პარტიებმა, ასევე, საზოგადოებრივმა ჯგუფებმა, რომლებიც ამ საპროტესტო მოძრაობის ყველაზე მნიშვნელოვანი ნაწილი არიან. თავისთავად, ეს იდეაა მნიშვნელოვანი.
ძირითადად, კოორდინაცია დემოკრატიულ ძალებს შორის ხდებოდა ხოლმე საგარეო ფრონტზე და ამან მნიშვნელოვანი შედეგებიც მოგვიტანა. ამიტომ, თუ ამგვარი კოორდინაციის მოდუსი და მექანიზმები გადმოვა შიდა საკითხებზე, იქნება ეს არჩევნების მომზადება, საკანონმდებლო ინიციატივების მომზადება თუ სხვა, რა თქმა უნდა, ეს არის ძალიან მნიშვნელოვანი", - თქვა ბოკუჩავამ "ტვ პირველის" ეთერში საუბრისას.
მისივე თქმით, შეხვედრაზე განიხილეს, ასევე, 31 მარტის "დიდი აქციის" ინიციატივა:
"განვიხილეთ 31 მარტის დიდი აქცია, რომელიც არის საქართველოს დამოუკიდებლობაზე რეფერენდუმის დღე, უმნიშვნელოვანესი დღე საქართველოს დამოუკიდებლობის ისტორიაში. ერთობლივად დავიწყებთ მზადებას".
"ლელოს" ლიდერმა, ბადრი ჯაფარიძემ ჟურნალისტებთან საუბარში თქვა, რომ საერთო ფორმატი მეხუთე პრეზიდენტის ირგვლივ უნდა შეიმუშაონ, მასში მონაწილეობას მიიღებენ პოლიტიკური ჯგუფები და ის საზოგადოება, რომელიც პროტესტში იღებს მონაწილეობას.
"სალომე ზურაბიშვილის პოზიციაა, რომ მოხდეს მაქსიმალური კოორდინირება, მაქსიმალური დაახლოება პოლიტიკური ჯგუფების, საზოგადოებრივი ჯგუფების. ჩვენ მიგვაჩნია, რომ პრეზიდენტის ირგვლივ უნდა მოხდეს ამ საერთო ფორმატის შემუშავება, ეს შეიძლება იყოს მშვიდობიანი წინააღმდეგობის ფრონტი, საკოორდინაციო საბჭო. შინაარსი არის ის, რომ აქ უნდა იყოს მართლაც პოლიტიკური ცენტრები, საზოგადოება და ის ადამიანები, რომლებიც დგანან ქუჩაში", - თქვა ბადრი ჯაფარიძემ.
პარტია "ფედერალისტების" ლიდერმა, თამარ ჩერგოლეიშვილმა განაცხადა, რომ ზურაბიშვილთან შეხვედრისას განიხილეს ახალი არჩევნებისთვის მომზადების საკითხიც, მათ შორის, პოლიტიკური პატიმრების თემა და საკანონმდებლო ბაზა.
"მთავარი არის, რომ ჩვენი ფოკუსი რჩება ახალ არჩევნებზე და მგონია, რომ ახალ არჩევნებს მივაღწევთ", - თქვა ჩერგოლეიშვილმა.
მეოთხე თვეა, საქართველოში უწყვეტი საპროტესტო აქციები მიმდინარეობს ევროინტეგრაციის გზაზე ქვეყნის დაბრუნების, ახალი საპარლამენტო არჩევნებისა და უკანონოდ დაკავებული დემონსტრანტების გათავისუფლების მოთხოვნებით.
აქციები მას შემდეგ დაიწყო, რაც 2024 წლის 28 ნოემბერს „ქართული ოცნების" მთავრობამ გამოაცხადა, რომ 2028 წლის ბოლომდე დღის წესრიგში აღარ დააყენებს ევროკავშირში გასაწევრიანებლად მოლაპარაკებების გახსნის საკითხს.