უიტკოფი: მოსკოვი უკრაინის ხუთ რეგიონთან დაკავშირებით „გარკვეულ დათმობებზე“ წავიდა
„ვიმედოვნებთ, რომ ამ საკითხზე გარკვეულ სიცხადეს მივიღებთ და იმედია, ეს ყველაფერი ძალიან მალე სამშვიდობო შეთანხმებით დასრულდება“, თქვა უიტკოფმა.
სპეციალურ წარმომადგენელს არ დაუსახელებია რეგიონები და არ ულაპარაკია სხვა დეტალებზე.
გარდა ამისა, უიტკოფის თქმით, ვაშინგტონმა და მოსკოვმა ასევე მიაღწიეს შეთანხმებებს უსაფრთხოების სფეროში.
„ჩვენ შევთანხმდით სერიოზულ უსაფრთხოების გარანტიებზე, რომლებსაც მე თამაშის წესების ცვლილებას ვუწოდებდი. არ გვეგონა, რომ შეერთებული შტატების მხრიდან ასე ახლოს ვიქნებოდით შეთანხმებასთან [ნატოს წესდების] მე-5 მუხლის მიხედვით დაცვის შესახებ, რუსეთში საკანონმდებლო დონეზე ვალდებულების კისრებასთან, რომ სამშვიდობო შეთანხმების კოდიფიცირების შემდეგ არ შეიჭრება სხვა ტერიტორიებზე და რუსეთის ვალდებულებასთან, რომ არ დაესხმება თავს სხვა ევროპულ ქვეყნებს ან არ დაარღვევს მათს სუვერენიტეტს“, თქვა უიტკოფმა.
Reuters-მა და Financial Times-მა ადრე გაავრცელეს ინფორმაცია, რომ ალასკაში გამართული მოლაპარაკებების დროს რუსეთი გამოვიდა წინადადებით, ზაპოროჟიესა და ხერსონის ოლქებში ფრონტის ხაზი გაყინოს, ასევე სუმისა და ხარკოვის ოლქების ოკუპირებული ტერიტორიებიდან გავიდეს, სანაცვლოდ კი მოითხოვა უკრაინის შეიარაღებული ძალების გასვლა კიევის მიერ კონტროლირებადი დონბასის რეგიონებიდან.
ინფორმირებულმა წყაროებმა ზელენსკის პოზიციის შესახებ Financial Times-ს განუცხადეს, რომ ის არ დათანხმდება დონბასის ნაწილის რუსეთისთვის გადაცემას, მაგრამ მზად არის ტერიტორიული საკითხი განიხილოს 18 აგვისტოს. გამოცემის წყაროების ცნობით, უკრაინის ლიდერი ამ საკითხზე მოლაპარაკებებისთვის ღიაა ასევე აშშ-სა და რუსეთის პრეზიდენტებთან, დონალდ ტრამპთან და ვლადიმირ პუტინთან სამმხრივ შეხვედრაზე.