Кремль сыншысы Навальный ес-түссіз жатыр. Ресей дәрігерлері оны Германияға жіберуге рұқсат етті
Ресейлік дәрігерлер Омбы қаласындағы ауруханада ес-түссіз жатқан оппозициялық саясаткер Алексей Навальныйды басқа ауруханаға я елге жіберуге рұқсат берді. Бұл туралы 21 тамыз кешкісін аурухана дәрігері Анатолий Калиниченко айтты. Сөзінше, құжаттар Навальныйдың әйеліне берілген. Жоспар бойынша, саясаткер 21 тамыз түнде Германиядан келген арнайы ұшақпен Берлинге жеткізілуі тиіс.
Ресей президенті Владимир Путиннің сыншысы Навальный 20 тамызда "уланған болуы мүмкін" деп ауруханаға түскен.
44 жастағы Навальный түскен Омбы ауруханасының бас дәрігері Александр Мураховский 21 тамызда журналистерге шығып, "саясаткердің халі сәл жақсарғанын, бірақ жағдайы әлі тұрақсыз" екенін айтқан еді.
Навальный жансақтау бөлімінде жасанды тыныс алу аппаратына қосылған. Ресейлік дәрігерлер ресми түрде диагноз қойған жоқ.
Омбы дәрігерлері басында науқасты басқа елге әкетуге "жағдайы келмейді" деп, рұқсат етпеген. Мураховский "науқасты орнынан қозғау және басқа ауруханаға ауыстыру қауіпті" деген.
21 тамызда Германия Навальныйды әкету үшін Омбыға арнайы ұшақ пен дәрігерлер тобын жіберген еді. Ол Германияға жеткізілген соң Берлиндегі Шарите ауруханасында емделеді деп жоспарланған. Саясаткердің әйелі Юлия Навальная Ресей билігінен күйеуін Германияға әкетуге рұқсат беруді талап еткен.
Навальный тобының өкілі Кира Ярмыш Twitter желісінде "Омбы ауруханасында медициналық жабдықсыз және диагнозсыз жату оның өміріне қауіп төндіреді" деп жазды.
Саясаткердің жақтастары "Навальный уланған" деп есептейді. Олар "улану белгілерін жасыру үшін Навальныйды басқа ауруханаға жібергісі келмейді" деген.
Омбыдағы аурухананың дәрігері Анатолий Калиниченко 21 тамызда журналистерге "қазірге дейін алынған қан мен дәрет анализінен у белгілері анықталмағанын" айтқан. Ал бас дәрігер Мураховский тағы бес анализдің нәтижесі шықпағанын, нақты диагнозды қоюға екі күн кететінін мәлімдеген.
"Қазір бірнеше диагноз бар. Соның бірі - зат алмасудың бұзылуы. Қанындағы қант мөлшері күрт түсіп кетуі мүмкін" деген еді Мураховский.
Навальный 20 тамызда Томск қаласынан Мәскеуге ұшып бара жатқанда жағдайы күрт нашарлап, ұшақ Омбы қаласына қонған. Кейін жедел жәрдеммен Омбыдағы ауруханаға жеткізілді.
Навальный басқаратын Жемқорлықпен күрес бюросының директоры Иван Жданов 21 тамызда "полицейлер ауруханада Алексейдің денесінен у тапқанын, ол заттың тек Навальный ғана емес, айналадағы адамдардың бәріне қауіпті екенін айтты" деді.
Бір күн бұрын Омбы ауруханасының дәрігері Анатолий Калиниченко Навальныйдың "уланғанына нақты анық емес. Бұл бір ғана нұсқа. Қазір бірнеше диагноз бойынша тест алдық" деген еді.
БАТЫСТЫҢ РЕАКЦИЯСЫ ҚАНДАЙ?
Еуропа одағы Ресейді Навальныйдың ес-түссіз жағдайға түсуіне не себеп болғанын анықтау үшін тергеу бастауға шақырды.
Ақ үйдің қауіпсіздік бойынша кеңесшісі Роберт О'Брайен 20 тамызда "Навальный уланған болуы мүмкін" деген хабарды "өте қорқынышты" деп атап, "бұл оқиға АҚШ пен Ресейдің қарым-қатынасына әсер етуі мүмкін" деді.
"Ол – өте батыл адам. Ресейдің ішінде [президент Владимир] Путинге қарсы тұрған өте қайсар саясаткер. Біз оның амандығын тілейміз. Егер бұл жағдайдың артында Ресей билігі тұрса, бұл біздің қатынасымыздың бағытына әсер етпек" деді ол Fox News арнасына берген сұхбатында.
Навальныйдың дәрігері Ярослав Ашихмин "Медуза" сайтына саясаткерді емдеу үшін "Еуропаға апару керек" деген. Оның пайымдауынша, батыс клиникаларында Навальный улануы мүмкін затты табуға мүмкіндік көп.
Кремль Навальныйдың ауруханаға түскенінен хабардар екенін, оның уланғанына нақты дәлел жоғын мәлімдеді. Путиннің баспасөз хатшысы Дмитрий Песков журналистерге "егер улану фактісі расталса, ресейлік органдар тергеу бастайтынын" хабарлады. Ол дәрігерлердің Навальныйды Германияға жіберуден бас тартуын "тек медициналық себеп" деп атады.
Навальный Мәскеуге ұшардың алдында кафеден шай ішкен. Бұл кафе әуежайдағы тіркелу аймағынан және бақылау аймағынан тыс жерде орналасқан.
Ресейдегі жемқорлық мәселелерін көтеріп жүрген саясаткер Навальный бұған дейін де бірнеше рет шабуылға ұшыраған. 2017 жылы белгісіз адам оның көзіне көкдәрі (зеленка) шашқан.
2019 жылы шілдеде Навальный "жұртты заңсыз митингіге шақырды" деп айыпталып, 30 күнге қамалған. Түрмеде оның беті бөртіп, ауруханаға жеткізілген. Кейін ол улануы мүмкін деген күдік болған.
Кейінгі жылдары Навальный бірнеше рет қамалған. Президент сайлауына және Мәскеу мэрі сайлауына жіберілмеді.
Навальный құрған Жемқорлыққа қарсы қордың өкілі Вячеслав Гимади Twitter парақшасында "Навальный саясаттағы қызметі мен белсенділігі үшін уланғаны анық" деп жазды.