Журналист Азамат Майтанов өзіне қарсы іс қозғалғанын хабарлады
Қазір шетелде тұратын Азамат Майтанов Қылмыстың кодекстің 274-бабы ("Көпе-көрнеу жалған ақпарат тарату") бойынша күдікке ілікті. Ол қылмыстық іске бір жыл бұрын телеграм-арнасында Қазақстан президенті Қасым-Жомарт Тоқаевты сынап жазған жазбасы түрткі болған деп есептейді.
Атырау облыстық полиция департаменті Азаттыққа Майтановтың үстінен "Көпе-көрнеу жалған ақпарат тарату" бабы бойынша іс қозғалғанын растады. Бірақ одан өзге ақпарат айтпады.
Майтанов өзіне қатысты тексеру жазда басталғанын айтады. Оның сөзінше, полиция журналистің жазбасын бөліскен белсенділерді шақырып, олардан мұның себебін сұраған.
- Қыркүйекте полиция үйіме келіп, ұлымнан мен туралы сұрап, мәлімет жинаған. Әкеңе телеграм-арнасында шығарған жазбасына қатысты іс қозғалып жатыр деген. Әртүрлі сұрақтар қойған. Кейін өзім Атырау облысы полиция департаментіне хабарластым, олар маған менің үстімнен іс қозғалғанын растады, - дейді Азамат Майтанов Азаттыққа.
Журналист полициядан нақты қай жазба үшін іс қозғалғанын сұраған, алайда полиция ол үшін "өзіңіз келуіңіз керек не адвокатыңызды жіберіңіз" деп айтқан.
Майтановтың сөзінше, полиция оның 2022 жылы 15 наурызда оппозициялық белсенді Жанболат Мамайдың қамауға алынғаны туралы жазбасын ұлына, соны бөліскен бірнеше адамға көрсеткен.
Майтанов онда биліктің белсендіні қудалауын қатаң сынға алған. Жанболат Мамай ол кезде "Жалған ақпарат таратты" деген күдікке ілініп жатқан еді.
"Халықтың көңілін Назарбаевтың отбасын арзан әшкерелеу мен мүлкінен айыруға бұрып, Қазақстан халқына жалған демократиялық реформалар мен еркіндікті уәде етіп, шын мәнінде Тоқаев саяси монополияны қайта құрып, билікке қарсыларды жойып, кез келген басқаша көзқарасты тыйып, өзінің билік вертикалін күшейтіп жатыр. Қазір елде полицияның озбырлығы мен саяси қудалауы Назарбаев тұсынан кем емес" делінген журналистің жазбасында.
Бұл – Майтановтың үстінен қозғалған екінші қылмыстық іс. 2022 жылы ақпанда Қаңтар оқиғасы кезінде оқ жаудырылған көліктердің фото, видеосын жариялағаны үшін журналиске қарсы қылмыстық іс қозғалған.
- Бірінші іс, білуімше, әлі жабылмаған. Қаңтар оқиғасында интернет өшкенде мен сыртқа шығып, видеоларды түсіріп жарияладым. Сол кезде полиция іс ақпарат министрлігінің арызымен бойынша қозғалды деген. Кейін "істі жауып тастаймыз" деп мені полицияға шақырған. Бірақ мен бармадым, сондықтан бұл ісім жабылмай мені күтіп тұр, - деді ол.
Журналист Азамат Майтанов ұзақ жыл тәуелсіз басыламдарда жұмыс істеген. 2011 жылы Азаттық радиосында да қызмет еткен. Кейінгі жылдары Атыраудағы "Ақ Жайық" басылымының бас редакторы болған. Қазір Еуропада тұрады.