Атырауда мұғалім өзіне-өзі қол жұмсамақ болды - комиссия құрылды
Атыраудағы №37 орта мектепте ағылшын тілі пәнінің мұғалімі педагогикалық кеңесте өзін балағаттаған соң, суицид жасамақ болды. Оқу-ағарту министрлігі жағдайға қатысты түсінік берді, - деп хабарлайды Tengrinews.kz тілшісі.
Әлеуметтік желіде жарияланған ақпарат бойынша ұстазды педагогикалық кеңесте жұрт алдында балағаттап, алаяқтық жасады деп айыптаған.
Оқу-ағарту министрлігі Білім сапасын қамтамасыз ету комитетінің баспасөз қызметі оқиғаға қатысты түсінік берді. Ведомствоның мәліметінше, жағдай комитеттің бақылауында.
"Жағдайды анықтау үшін қалалық басқарманың, Атырау облысы әкімдігінің білім басқармасының және Оқу-ағарту министрлігінің білім сапасын қамтамасыз ету аумақтық департаментінің өкілдерінен тұратын арнайы комиссия құрылды", - делінген хабарламада.
Қазір мән-жайды жан-жақты зерттеу үшін тергеу басталды.
"Министрліктің аумақтық департаменті педагогикалық әдеп мәселелері бойынша жоспардан тыс өңірлік кеңес өткізеді, оның қорытындысы бойынша тиісті шаралар қабылданады", - деп атап өтті ведомство.
Комитеттің баспасөз қызметі ұстаздың жағдайы тұрақты екенін хабарлады.
"Өзін жақсы сезінеді, мұғалімге қажетті психологиялық көмек көрсетіледі", - делінген хабарламада.
Сілтемесіз жаңалық оқисыз ба? Онда Telegram желісінде парақшамызға тіркеліңіз!