Лос-Анджелестегі өрт бағытын өзгертті: зардап шеккендер саны артты
Калифорниядағы орман өрттерінен қаза тапқандар саны 13 адамға дейін өсті, - деп хабарлайды Tengrinews.kz тілшісі NBC News-ке сілтеме жасап.
"Калифорнияның оңтүстігінде өртеніп жатқан орман өрттерінен кем дегенде 13 адам қаза тапты", - деді телеарна биліктің мәліметтеріне сілтеме жасай отырып.
Сенбіде Лос-Анджелес шерифі Роберт Луна тағы 13-ке жуық тұрғын жоғалып кеткенін хабарлады. Іздестіру-құтқару операциясы жүзеге асырылған кезде зардап шеккендердің саны артады деп күтіліп отыр.
Сенбіде, 11 қаңтарда, осы аптада Лос-Анджелестің бір бөлігін қиратқан үлкен өрт бағытын өзгертті. Бұл - өрт сөндіру бөлімдерін қайта орналастыруға және жаңа эвакуациялауға әкелді деп хабарлайды "Америка дауысы".
Қаланың батыс шетіндегі Палисейдс аймағындағы өрт енді жаңа бағытқа бет алды. Өрт Брентвудтың осы уақытқа дейін қамтылмаған аудандарына және Сан-Фернандо алқабының етегіне жақындайды.
Жел бағытын өзгертпес бұрын, өртсөндірушілер Палисейдс пен Итон аудандарында өртті сөндірудегі жетістіктер туралы хабарлаған болатын.
Ұлттық ауа райы қызметі демалыс күндері Лос-Анджелес аймағындағы жағдай жақсарып, желдің жылдамдығы сағатына 30 шақырымға дейін төмендеуі керек деп мәлімдеді, алайда келесі аптаның сейсенбісінен бастап желдің жылдамдығы қайтадан артады.
Жергілікті билік сонымен қатар қалың, улы түтінге байланысты төтенше жағдай жариялады. Өрт кезінде металдардың, пластмассалардың және басқа синтетикалық материалдардың қалдықтары ауаға тарады.
Сейсенбіден бері Лос-Анджелес округінің аудандарын шарпыған алты өрт 10 мың құрылымды қиратты. AccuWeather апаттың шығыны мен экономикалық шығынын 135-150 миллиард долларға бағалады. Өрт мұхит жағалауындағы әйгілі актерлер мен басқа да адамдардың ондаған үйлерін отқа орады.
Аптаның басты оқиғалары мен пайдалы видеоларды көру үшін YouTube арнамызға жазылыңыз
Сілтемесіз жаңалық оқисыз ба? Онда Telegram желісінде парақшамызға тіркеліңіз!