ІІМ операциясы: Алматы мен Ақтауда 6 адам ұсталды
Жедел-іздестіру іс-шаралары кешені нәтижесінде он келіге дейінгі марихуананы Ақтауда сатудың кезеңдік сызбасы құжаттандырылды. Іздеу іс-шаралары қаланың әртүрлі жерлерінде, пәтерлерде және адам тұрмайтын үй-жайларда жүргізілген.
Тәркіленген есірткінің жалпы салмағы 200 келіден астам болды. Көрсетілген қаланың төрт тұрғыны және еліміздің оңтүстік өңірінің бір тұрғыны қамауға алынған.
"Осындай әдіспен Алматы ПД ұйымдасқан қылмысқа қарсы күрес басқармасының қызметкерлері де жедел әзірлеме жүргізді. Нәтижесінде оңтүстік астананың тұрғыны ұсталып, оның тұрғылықты жері бойынша аса ірі көлемде мефедрон және марихуана тәркіленді", – деді ІІМ ұйымдасқан қылмысқа қарсы күрес департаментінің өкілі Қуандық Алпыс.
Одан әрі жүргізілген іс-шаралар барысында Алматы облысында есірткі зертханасы қызметінің жолы кесілген. Онда синтетикалық есірткі өндірісінде пайдаланылатын 600 литрден және 100 келіден астам әртүрлі прекурсорлар тәркіленді. Осылайша 100 келіден астам синтетикалық есірткіні дайындауға және сатуға жол берілген жоқ.
"Жедел іс-шаралар жалғасуда, аталған фактілерге қатысы бар басқа да адамдар анықталуда. Осы бағыттағы жұмыс Ішкі істер министрлігінің ерекше бақылауында", – деді Қуандық Алпыс.
Сілтемесіз жаңалық оқисыз ба? Онда Telegram желісінде парақшамызға тіркеліңіз!