Путин Қырғызстанның бұрынғы басшысы Ақаевқа "еңбегі сіңген ғылым қайраткері" атағын берді
Ресми мәліметке қарағанда, бұл атақ Ақаевқа "жоғары білікті мамандар даярлаудағы сіңірген еңбегі, ғылыми-педагогикалық қызметі және көп жылғы адал еңбегі үшін" берілген.
Қырғызстанның бірінші президенті Асқар Ақаев елді 1990-2005 жылдары аралығында басқарған. Ол қызғалдақ төңкерісі кезінде елден кеткен. Содан бері отбасымен бірге Ресейде тұрады. Ақаев – Ломоносов атындағы Мәскеу мемлекеттік университетінде профессор.
Асқар Ақаев 2022 жылы Қырғызстанға екі рет барып, алтын өндіретін "Құмтөр" кенішін игеруге қатысты жобадағы ықтимал жемқорлық ісі бойынша тергелген. Кейін Қырғызстанның бас прокуратурасы Ақаевқа қарсы айыптауларды мерзімнің өтуіне байланысты алып тастаған.
Былтыр күзде Асқар Ақаев қырғыз парламентіне хат жазып, өзіне экс-президент мәртебесін қайтаруды өтінген. Алайда парламент өтінішті орындамаған.
Экс-президент мәртебесі тиіспеушілік дәрежесін сыйлап, бұрынғы президенттің мүліктерін де қамтиды. Экс-президентке мемлекеттік күзет, тегін үкіметтік байланыс беріледі. Ол сонымен бірге ресми тұлғаларға арналған залдар мен әуежай делегацияларын, темір жол вокзалдарын пайдалана алады.
Қырғызстанда экс-президент статусы Роза Отынбаева мен 2020 жылы қазанда отставкаға кеткен Сооронбай Жээнбековте бар. Құрманбек Бакиев пен Асқар Ақаев 2010 жылғы уақытша үкіметтің декретімен бұрынғы президент статустарынан айырылған. 2019 жылы Алмазбек Атамбаев та бұрынғы президент мәртебесінен айырылды.