Қазақстандағы АЭС құрылысы: премьер-министр мәлімдеме жасады
Үкіметтің кеңейтілген отырысында премьер-министр Олжас Бектенов Қазақстандағы алғашқы атом электр станциясын (АЭС) салу бойынша келісімдердің жақын арада жасалатынын мәлімдеді, - деп хабарлайды Tengrinews.kz тілшісі.
"Алдағы уақытта Алматы облысында алғашқы атом электр станциясын салу бойынша қажетті келісімдерге қол қоямыз. Сонымен қатар екінші және үшінші атом электр станцияларының құрылысы үшін өңірлерде талдау аяқталуға жақын", – деді премьер-министр.
Бұған дейін Президент Қасым-Жомарт Тоқаев АЭС құрылысы мәселесін тездету қажеттігін атап өткен еді.
"Атом станцияларын салу бойынша жылдам қимылдауымыз керек. Мен бұған дейін сұхбатымда айтқанмын, біз екі үлкен станция саламыз, мүмкін, үш станция болады. Қазақстанды дамыған ядролық энергетикасы бар елге, жасанды интеллект пен цифрландыру толық жұмыс істейтін мемлекетке айналдыруымыз керек", – деді Тоқаев.
2024 жылдың қарашасында Энергетика министрлігі АЭС құрылысы технологияларының әлеуетті жеткізушілерімен келіссөздер басталғанын хабарлады.
Бүгін Астанада Мемлекет басшысының қатысуымен үкіметтің кеңейтілген отырысы өтіп жатыр. Онда елдің 2024 жылғы әлеуметтік-экономикалық даму қорытындылары жасалып, алдағы кезеңге арналған негізгі міндеттер анықталады. Жиында премьер-министр Олжас Бектенов, Ұлттық банк төрағасы Тимур Сүлейменов және бірқатар өңір әкімі баяндама жасайды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!