Алматыда 19 жастағы әлем чемпионының өліміне қатысты тың дерек айтылды
Алматы Полиция департаменті муай-тайдан әлем чемпионы, 19 жастағы Серік Әлидің өліміне қатысты егжей-тегжейлі мәлімет берді, - деп хабарлайды Tengrinews.kz тілшісі.
Қанды оқиға 2024 жылдың 24 желтоқсанында Алматының Наурызбай ауданында болған.
Полицияның мәліметінше, күдікті мен спортшы бұрыннан таныс болған.
"Адам өлтіру дерегі бойынша қылмыстық іс қозғалды. Күдікті оқиға болған жерде ұсталып, уақытша ұстау изоляторына қамалды. Кейін ол қамауға алынды. Алдын ала мәліметтер бойынша, қылмысқа С. мен күдіктінің арасындағы жанжал себеп болған. Тергеу амалдары жалғасып жатыр", – деп мәлімдеді полиция Tengri Sport-тың ресми сұранысына жауап ретінде.
Марқұмның жаттықтырушысы Рамис Габитовтың айтуынша, Серікті "өзінің сыныптасы пышақтаған", алайда жанжалдың нақты себебі белгісіз.
Серіктің анасы Ақмарал Табысбекқызы да күдікті мен ұлының бұрыннан жақын араласқанын растады.
"Олар туған бауырлардай бірге жүретін. Бірге өсті. Баламды кеуде мен мойын тұсына төрт рет пышақтап тастаған. Төрт жерден пышақ жарақатын алған", – деді ол KTK телеарнасына берген сұхбатында.
Сілтемесіз жаңалық оқисыз ба? Онда Telegram желісінде парақшамызға тіркеліңіз!