Ақмола облысында бөгет бұзылды - өңірде қазір не болып жатыр?

Ақмола облысының Қорғалжын ауданында еріген қар суының келуіне байланысты "Шөптікөл" бөгеті бұзылды. Өңір әкімдігі оқиға орнындағы жағдай туралы мәлімдеді, - деп жазады Tengrinews.kz.
Әкімдік мәліметінше, қазіргі уақытта жақын маңдағы елді мекен - Сабынды ауылын су басу қаупі толығымен сейілді. Барлық нысан штаттық режимде жұмыс істеп тұр.

" Жергілікті атқарушы органдар, ТЖМ күштері және тұрғындардың қатысуымен Астана – Қорғалжын республикалық автожолының жол жамылғысының деңгейін көтеру арқылы еріген суды дала аймағына бұру жұмыстары жүргізіліп жатыр. Салдарды жоюға 56 техника мен 230-дан аса жергілікті тұрғын мен ТЖМ жеке құрамы жұмылдырылды. 5 мың қапшық пен 50 мың тонна инертті материал дайындалып, 800 метрлік топырақ үйіндісі тұрғызылды. Жағдай тиісті қызметтердің бақылауында", - деп хабарлады әкімдіктен.

"Шөптікөл" бөгетінің сыйымдылығы 4,71 миллион текше метр суды құрайды, су айдынының ауданы 157 гектар, орташа тереңдігі 3 метрге жуық. Құрылыс Астана - Қорғалжын республикалық автожолының учаскесін су басудан қорғайды, сондай-ақ Шевченко және Балқаш тоғандарын сумен қамтамасыз етеді.

Не болды?
Жексенбі күні кешкісін, 5 сәуірде Ақмола облысының Қорғалжын ауданында "Шөптікөл" бөгетінің дамбасы жарылды, ол Сабынды ауылынан солтүстікке қарай екі шақырым жерде орналасқан.
Куәгерлер Астана - Қорғалжын тасжолының бір бөлігін еріген қар суы шайып кеткенін хабарлады. Бұған жауап ретінде "ҚазАвтоЖол" өкілдері су ағыны Астана - Қорғалжын республикалық автожолының 75-шақырымынан өтіп жатқанын, алайда жолдың жүру бөлігіне су жайылмағанын мәлімдеді.

Кейінірек бөгеттегі қалпына келтіру жұмыстарының барысы туралы облыс әкімінің орынбасары Мұрат Балпан баяндады.