Павлодар тұрғыны жалған нөмір таққаны үшін көлігінен айырылды
Омбы - Майқапшағай тасжолында полицейлер жалған нөмір таққан ВАЗ-21093 көлігін тоқтатты, деп хабарлайды Tengri Auto тілшісі Polisia.kz порталына сілтеме жасап.
Көлікті облыс орталығының тұрғыны тізгіндеген. Тексеріс барысында мемлекеттік нөмірдің басқа автокөлікке тиесілі екені анықталды.
Жүргізушіге қатысты көрінеу жалған мемлекеттік тіркеу нөмірін пайдаланғаны үшін хаттама толтырылды. Нөмірлер тәркіленіп, көлік айып тұрағына қойылды. Іс материалдары одан әрі қарау үшін тиісті органдарға жолданған.
Полиция өкілдері көлікке тек өз атына ресми тіркелген нөмірлерді ғана тағу керектігін ескертеді.
Жалған немесе бөтен нөмірді пайдаланғаны үшін заңда қылмыстық жауапкершілікке дейінгі жаза қарастырылған.