АҚШ Ормуз бұғазын миналаудың алдын алу үшін Иранға соққы жасады

АҚШ Иранға тағы да соққы жасады. Бұл АҚШ президенті Дональд Трамп бұғаздағы екі апталық әскери науқанды тоқтатқан шілде соңынан бергі алғашқы әскери операция, деп хабарлайды Tengrinews.kz.
Аталған соққыларға қатысты АҚШ Орталық қолбасшылығы жауап берді.

"Бүгін ертерек Америка әскері Ларак аралындағы ирандық екі ұшыру қондырғысына соққы жасады. Ислам революциясы күзет корпусының күштері Ормуз бұғазына теңіз миналары бар зымырандарды ұшыруға дайындалып жатқаны байқалды", - деді АҚШ Орталық қолбасшылығының өкілі.

Иранның Tasnim ақпарат агенттігі соққының ұшқышсыз ұшу аппараты арқылы жасалғанын, салдарынан екі адам қаза тауып, тағы екеуі жараланғанын хабарлады.
Америкалық шенеунік Axios басылымына Иран соққыға жауап ретінде Иорданиядағы АҚШ әскери базасына баллистикалық зымырандар атқанын мәлімдеді.
Оның айтуынша, бірнеше зымыран ұшырылған, бірақ олар Америка базаларына тимеген, шығындар мен құрбандар туралы ақпарат түскен жоқ.
Иордания әскерилері Ираннан ұшырылған сегіз зымыранның әуе шабуылына қарсы қорғаныс жүйелерімен атып түсірілгенін хабарлады.
Бұған дейін Трамп Иран тарапына кез келген жаңа мина орнататын кеме немесе қайықтың "дереу және жүйелі түрде жойылатыны" туралы ескерту жасалғанын айтқан болатын.

"Миналарды орналастыруға қатысты мүлдем төзбеушілік саясаты қолданылады", - деп жазды Трамп Truth Social желісінде.

Оның сөзінше, АҚШ әскері "бұл аймақты жіті қадағалап отыр және бұғаз арқылы тауарлардың кедергісіз өтуін қамтамасыз етуге дайын".