Доллар тағы арзандады: бағам 2024 жылғы мамырдан бергі минимумды жаңартты

Қазақстандағы сауда-саттықта доллар бағамы төмендеп жатыр. 16 қыркүйекте Қазақстан қор биржасында (KASE) қандай бағам орнағанын Tengrinews.kz хабарлайды.
KASE-дегі күндізгі сауда-саттық қорытындысы бойынша доллардың орташа бағамы 2,8 теңгеге төмендеп, 444,88 теңге болды. Айта кетейік, бұл - доллар 445 теңгеден төмен түскен 2024 жылғы мамырдан бергі ең төменгі көрсеткіш.Ұлттық банктің 16 қыркүйектегі ресми бағамы 447,88 теңге.
Алматыдағы ақша айырбастау пунктеріндегі доллардың орташа бағамы

сатып алу - 444,41 теңге;сату - 446,44 теңге.

Астанадағы ақша айырбастау пунктеріндегі доллардың орташа бағамы

сатып алу - орташа есеппен 443,02 теңге;сату - 450,02 теңге.

Доллар неге арзандап жатыр?
Бұған дейін экономистер Tengrinews.kz-ке теңгенің нығаюына бірнеше фактор әсер етіп жатқанын айтқан болатын. Сарапшылар Қазақстанның экспорттық кірісін демеп тұрған мұнайдың жоғары бағасын, сондай-ақ ірі экспорттаушылардың валюталық түсімді сатуын атап өтті.Ұлттық валютаға инвестиция салудың тартымды шарттары да теңгеге қосымша қолдау көрсетті: Ұлттық банктің базалық мөлшерлемесі жоғары деңгейде қалып отыр, сондықтан теңгелік құралдар инвесторлар үшін қызығушылығын жоғалтқан жоқ.
Сондай-ақ бағамға әлемдік валюта нарығындағы жағдай мен АҚШ Федералды резерв жүйесінің шешімдеріне қатысты болжамдар да әсер етті. Осы факторлардың аясында Қазақстанда долларға сұраныс салыстырмалы түрде төмен болып отыр.
Бұл ретте сарапшылар теңгенің қазіргі нығаюы міндетті түрде ұзақ мерзімді болады дегенді білдірмейтінін ескертеді. Болашақта бағам динамикасына мұнай бағасы, сыртқы экономикалық ахуал, Ұлттық банктің іс-әрекеттері мен валютаға сұраныстың өзгеруі әсер етуі мүмкін.