“Министр Такиевтен лицензия”: Қаржы министрлігі қазақстандықтарға ескерту жасады

Қазақстан Қаржы министрлігі ведомство басшысы Мәди Такиевтің "инвестициялық қызметті жүзеге асыруға лицензия" бергені туралы ақпаратты жоққа шығарды. Қаржы министрлігі мұндай рұқсат қағаздарын беру ведомство құзыретіне кірмейтінін мәлімдеді, деп хабарлайды Tengrinews.kz тілшісі.
Ведомствоның хабарлауынша, әлеуметтік желілерде қаржы министрінің инвестициялық қызметке лицензия бергені туралы тарап жатқан ақпарат шындыққа жанаспайды.

"Қазақстан Республикасының Қаржы министрлігі қаржы нарығындағы брокерлік, дилерлік, инвестициялық немесе өзге де кәсіби қызмет түрлерін лицензиялауды жүзеге асырмайды", - делінген хабарламада.

Қаржы министрлігі инвестициялық компаниялардың, брокерлердің және қаржы нарығының басқа да кәсіби қатысушыларының қызметін лицензиялауды, тіркеуді және қадағалауды Қазақстан заңнамасына сәйкес уәкілетті мемлекеттік орган жүзеге асыратынын нақтылады.
Қаржылық қызметтерді ұсынатын кез келген ұйым заңмен белгіленген тіркеу рәсімінен өтіп, тиісті рұқсат алуы тиіс.
Осыған байланысты Қаржы министрлігі азаматтарға қырағылық танытуды және қаржы ұйымдарының заңдылығын тек ресми мемлекеттік тізілімдер арқылы тексеруді ұсынды.