Wildberries Алматыдағы құрылыс дауына байланысты қылмыстық іске іліге жаздады
Wildberries компаниясы Алматыда ірі логистикалық орталық құрылысы кезінде қылмыстық іске іліге жаздады. Нысан аумағында тергеу амалдары жүргізіліп, техника мөрленіп тасталған, деп хабарлайды Tengrinews.kz Бас прокуратураның инвесторлар құқығын қорғау комитетіне сілтеме жасап.
Тінту және мөрленген техника
Инвесторлар құқығын қорғау комитетіне Алматыда Wildberries компаниясының ірі логистикалық орталығын салу жобасын іске асырып жатқан инвестор жүгінді. Бұған құрылыс алаңындағы тергеу амалдары, атап айтқанда, тінту жүргізу және техниканы мөрлеп тастау себеп болған.
Инвестордың айтуынша, мұндай әрекеттер жобаның жүзеге асуына қауіп төндірген.
Комитет Алматы прокуратурасына қылмыстық істің тіркелу заңдылығын және қабылданған процестік шешімдерді тексеруді тапсырды.
Мердігерлер арасындағы дау азаматтық сипатта болып шыққан
Тексеріс нәтижесінде анықталғандай, даудың туындауына құрылыс кезінде мердігер мен қосалқы мердігер арасындағы келіспеушілік себеп болған.
Прокуратура бұл қақтығыстың азаматтық-құқықтық сипаты бар деген қорытындыға келді. Қылмыстық қудалауға ешқандай негіз болмаған.
"2024 жылғы 2 қыркүйекте қылмыстық іс құрамы болмауына байланысты тоқтатылды. Сонымен қатар, кінәлі лауазымды тұлғаларды тәртіптік жауапкершілікке тарту мәселесі қозғалды", – деді комитет прокуроры Рауан Әлмішев.
Еске сала кетейік, бұған дейін Wildberries компаниясының Қазақстандағы қойма инфрақұрылымын дамыту жоспары белгілі болған еді. Тамызда Сауда және интеграция министрі Арман Шаққалиев компания Алматыда ауданы шамамен 170 мың шаршы метр, ал Астанада шамамен 100 мың шаршы метр болатын логистикалық кешен салып жатқанын хабарлаған болатын.