Караџовски го брани интегритетот на новоизбраните судии

Претседателот на Судскиот совет на Република Македонија Зоран Караџовски денеска застана во одбрана на сите одлуки донесени од страна на Советот. Тој од Охрид порача дека став на Судскиот совет е оти сите избрани судии во моментот се вистинскиот избор, независно што Советот како колективно тело во определени случаи немал единствен став при изјаснувањето.


За именувањето на поранешниот член на ДИК, Субхи Јакупи, за судија во Вишиот управен суд, Караџовски со образложение дека кандидатот го добил потребниот број гласови. „Мнозинството членови на Судскиот совет оцени дека тој е најдобриот кандидат. Немаше единствен став во изјаснувањето, но го доби потребниот број гласови и тука нема што да кажам“, рече Караџовски.


Претседателот на Судскиот совет во Охрид учествува во работата на дводневната Меѓународна конференција посветена на реформите во правосудството. Алијансата за Албанците вчера реагира на, како што наведоа, изборот на „партиски судии од Републичкиот судски совет, кој е трансформиран во гласачка машинерија со избирање на кандидати кои се делегираат од партиските седишта на СДСМ и ДУИ“. Тие реагираат на тоа што Субхи Јакупи, кој е поранешен член на Државната изборна комисија од ДУИ, е избран за виш судија на Управниот суд.