Тачи: Од Путин добив поддршка за дијалогот со Србија

Претседателот на Косово, Хашим Тачи, денеска објави дека се сретнал со неговиот руски колега Владимир Путин, кој му изразил поддршка во напорите за постигнување конечен договор со Србија, јави дописникот на МИА од Приштина. Средбата се одржала во Париз, каде што Тачи и Путин беа меѓу бројните светски лидери кои присуствуваа на церемонијата за одбележување на 100-годишнината од крајот на Првата светска војна.


„Во Париз првпат се сретнав со претседателот на Русија, Владимир Путин. Дијалогот за нормализирање на односите меѓу Косово и Србија и можноста за постигнување сеопфатен и законски обврзувачки договор беа главниот фокус на нашиот разговор. Во врска со ова прашање претседателот на Русија беше јасен: „Доколку вие (Косово и Србија) постигнете мировен договор, Русија ќе го поддржи тој договор“, напиша Тачи на Фејсбук.