Ѕвездан Георгиевски – в.д. претседател на новинарскиот синдикат

Новинарот Ѕвездан Георгиевски ќе биде в.д. претседател на Самостојниот синдикат на новинари и медиумски работници (ССНМ) до изборот на нов претседател. На денешното изборно собрание на синдикатот беше избрано ново раководство.


„Изборот на в.д. претседател дојде поради тоа што немаше кандидат од членовите на ССНМ за претседател, а раководењето го презема Извршниот одбор“, рече Тамара Чаусидис, која на оваа функција беше во изминатите осум години.


В.д. претседателот Георгиевски потенцираше дека Самостојниот синдикат на новинарите и медиумските работници е важна алка не само во остварувањето на новинарските права што произлегуваат од работниот однос и во зголемувањето на социјалниот статус на новинарите, туку и во остварувањето на новинарскиот идеал – слобода на говорот. Без економски и социјални услови нема ниту слободно новинарство, рече тој.


На Собранието беа избрани и назначени новите членови на Извршниот одбор, Надзорниот одбор и членови на Статутарна комисија.