Без изјави по состанокот на Весели и Харадинај со американскиот амбасадор за таксата за увоз од Србија

Американскиот амбасадор во Косово, Филип Коснет прв ја напушти зградата на косовското Собрание, каде што одржа состанок со парламентарниот спикер Кадри Весели и премиерот Рамуш Харадинај во врска со таксата за увоз на стоки од Србија и од Босна и Херцеговина, но не даде никаква изјава за медиумите за исходот од разговорите, јави дописникот на МИА од Приштина.


По Коснет, од кабинетот на Весели излезе и Харадинај, кој исто така не даде информации за текот на разговорите и нивниот исход.


Претседателот на косовското Собрание Весели денеска беше домаќин на состанокот на Харадинај и амбасадорот Коснет, на кој, според најавите, е разгледано американското барање упатено до косовската Влада за укинување на таксата од 100 отсто на увозот од Србија и БиХ.


Харадинај досега беше упорен во ставот дека владината одлука ќе остане во сила сè додека Србија не го смени односот кон Косово и не ја признае неговата независност. Меѓутоа, последните денови сè повеќе расте притисокот за укинување на таксата, како од надвор, така и од внатре.


Освен од САД и Европската унија, сè позачестени се барањата и од самите членови на Владата и од коалициските партии, како и од претседателот на државата Хашим Тачи, кој очекува таксата веднаш да се укине за да можат да продолжат и да се финализираат преговорите со Србија за нормализација на односите меѓу двете земји.