Кривична пријава против Лила Стојановска за затајување данок

Управата за финансиска полиција денеска соопшти дека поради постоење основи на сомневање за сторено кривично дело „Даночно затајување“ до Основно јавно обвинителство Скопје поднеле кривична пријава против Л.С.. Во соопштението тие наведуваат дека Л.С.во својство на физичко лице во периодот од 21.06.2017 година до 07.07.2017 година, на личната банкарска сметка, во три наврати примила парични средства во вкупен износ од 16.095.600 денари, по основ на склучен Договор за изготвување на „Проект за Интернационална асоцијација за заштита на човековите права“ со Друштвото ИЗГРАДБА ИНЖЕНЕРИНГ ДАН-МАК Скопје и лицата Е.Н. и Д.Н..

Деновиве во јавноста косопственичка на градежната компанија ДАН-МАК Ена Норнилд тврдеше дека на водителката Лила Стојановска и дала пари за изградба на пензионерски домови кои потоа не и биле вратени, што адвокатот на водителката го негираше со тврдење дека долгот бил вратен. Стојановска, која важеше за блиска пријателка на првоосмничениот во „Рекет“ Бојан Јовановски се појави на суд како сведок во тој случај.

Боки 13 тврди дека има докази за корупција за обвинителката Русковска

Како што информира денеска Финансиската полиција, расположивите парични средства како остварен приход Л.С. ги подигнала во целост и во готово за себе лично, при што без да ги пријави во Годишната даночна пријава за 2017 година до Управата за јавни приходи, не пресметала и не уплатила персонален данок на доход во висина од 1.788.398 денари, за кој го оштетила Буџетот на Република Северна Македонија. Управата за финансиска полиција постапила по овој случај откако претходно до неа е доставена Пријава од Друштвото ИЗГРАДБА ИНЖЕНЕРИНГ ДАН-МАК и лицата Е.Н. и Д.Н..