Министерство за правда: Десковска не е на средба со Џафери

Од министерството за правда за радио Слободна Европа демантираат дека министерката Рената Десковска е на средба со претседателот на собранието Талат Џафери на која наводно се договара нова верзија на законот за јавно обвинителство.

Дел од медиумите веќе јавија дека токму тоа е причината поради која повеќе од три часа доцни собраниската седница на која требаше да се утврди потребата од донесување на овој закон. Претходно координаторот на пратеничката група на СДСМ, Јован Митрески рече дека за предлог законот за јавно обвинителство била постигната доволно добра основа за поддршка од најмалку 80 пратеници.

Од друга страна пак ДУИ, но и опозициските Алијанса за Албанците и Беса денеска соопштија дека нема да ја поддржат предлог верзијата на законот доставена до Собранието, бидејќи не била во согласност со договореното во Министерството за правда.

Лидерот на ВМРО-ДПМНЕ Христијан Мицкоски денеска изјави дека остануваат на ставот против законот за јавно обвинителство и обвини дека власта со сила наметнува законски решенија кои се спротивни на Уставот, на европските вредности и на интересите на македонските граѓани.

На денешната седница, според договорот, требаше да се утврди потребата за донесување на овој закон. Потоа законот кој ќе се носи по скратена постапка и со европско знаменце треба да помине во матичната Комисија за европски прашања, по што Предлог законот треба да биде повторно ставен на дневен ред на Собранието и усвоен на пленарна седница пред неговото распуштање.