Расте бројот на жртви од невремето во Европа

Најмалку пет лица загинале во силно зимско невреме што погоди делови од Европа, придружено со обилни врнежи од дожд и силен ветер и предизвика големи сообраќајни нарушувања.

Две жени, мајка и ќерка, загинале во Полска, а две други се повредени откако невреме го урна покривот на зграда во зимското одморалиште Буковина Татжанска во близина на границата со Словачка, соопшти полицијата.

Во Шведска, еден човек се удавил откако се превртел чамец во кој пловел со друго лице. Двајца мажи починале во Словенија, како и на југот на Англија, кога врз нивните автомобили паднало дрво.

Во Велика Британија, каде што во неделата беше најсилното невреме, повеќе од 20.000 домови сè уште се без електрична енергија додека се уште се со сила предупредувањата за обилни поплави. Британската транспортна мрежа сè уште е во застој, а бројни летови, железнички и бродски линии се откажани или одложени.

Невремето ја погоди и Франција, а метеоролозите предупредуваат дека на Корзика јачината на ветерот би можела да достигне 200 километри на час до крајот на денот, пренесува Асошиејтед Прес.