Чулев: незаконска е одлуката на владата за поништување на распоредувањата

Министерот за внатрешни работи Наќе Чулев денеска преку соопштение испратено од МВР наведува дека незаконска е одлуката на Владата за поништување на 88 решенија за распоредувања во МВР кои тој ги донесе. Чулев на вработените им порачува да продолжатбез никакви притисоци и совесно и одговорно да ги извршуваат работните задачи и обврски.

„Одлуката на Владата со која се поништуваат конкретните решенија за распоредување на работниците во Министерството за внатрешни работи е противзаконска и донесена во постапка која е спротивна на одредбите од прописите кои го регулираат работењето на Владата, а особено во спротивно со одредбите на Законот за организација и работа на органите на државната управа и Законот за Влада“, наведуваат во писменото соопштение од МВР во кое се цитира министерот Чулев.

Претходно денеска владата соопшти дека на синоќешната седница била усвоена одлука за поништување на 89 решенија за распоредување на работно место што ги донел Чулев на 6 и 7 февруари оваа година.

Владата поништи 89 распоредувања на Чулев во МВР

Дополнителната заменичка министерка за внатрешни работи Славјанка Петровска реагираше на соопштението од министерот наведувајќи дека тој не смее да ја злоупотребува својата позиција и да ги поттикнува вработените да сторат повреда на законот и да не ја почитуваат одлуката на Владата.

„На секој правник му е јасно дека одлука донесена во законска процедура не може да биде суспендирана врз основа на телеграма, па затоа доколку тој не се сложува со одлуката на Владата на Република Северна Македонија, треба тоа да го изрази согласно законските процедури пред институциите, а не со телеграма“, наведува Петровска.