Вечерва почнува јубилејното 60. издание на „Охридско лето“

Во Античкиот театар во Охрид, со концерт посветен на нашата оперска примадона Ана Липша Тофовиќ, вечерва ќе биде отворено јубилејното 60. издание на „Охридско лето“. Концертот насловен „Вокални бисери – по стапките на Ана Липша“, на верната фестивалска публика ќе и понуди познати светски арии во изведба на солистите Марија Јелиќ (сопран), Дарио ди Виетри (тенор), Иван Томашев (бас) и Аманда Стојовиќ (мецосопран) во пијано придружба на Миливое Велиќ.

Свеченото отворање на нашата најреномирана музичко-сценска манифестација и целата фестивалска програма ќе се одржува во поинакви околности поради пандемијата на коронавирусот. Јубилејното фестивалско издание за првпат од 1961 година се одржува надвор од вообичаениот термин, од 4 август до 20 септември, со строги придржувања кон протоколите за заштита од ширење на Ковид-19. Од Управата на Фестивалот однапред е нагласено дека независно од интересот кај публиката за некоја од понудените содржини, во ниту еден случај нема да биде дозволено пречекорување на однапред предвидениот број седишта.

Охридско лето - Еднаш Карерас, другпат Лане моје

Во текот на наредните 28 фестивалски денови, на отворените сцени на Античкиот театар, Долни Сарај, предворјето на „Света Софија“, како и самата црква ќе има околу 300 уметници од 19 земји, како и голем број домашни уметници. Музичката програма на „Охридско лето“ годинава содржи 26 концерти, од кои два во фестивалската оф-програма.