Трамп: Експлозијата во Бејрут може да е напад со некаква бомба

Претседателот Доналд Трамп синоќа изјави дека е можно голема експлозија во Бејрут да е напад, и покрај изјавите на либанските лидери дека таа најверојатно е предизвикана од високо-експлозивен материјал што со години се чувал во магацините во главниот либански град, пренесе Ројтерс.

Трамп им рече на новинарите дека се сретнал со неколку генерали кои „мислат дека станува збор за напад и дека тоа била бомба од некаков вид“.

Од двете разорни експлозии што вчера го потресоа централниот дел на либанскиот главен град Бејрут, загинаа најмалку 100 луѓе, а илјадници се повредени, изјави денеска шефот на либанскиот Црвен крст Џорџ Кетанех. Со преполни болници полни и со луѓе кои сè уште се затрупани под урнатините бројот на загинатите се очекува да порасне. Либанскиот министер за здравство Хамад Хасан, претходно изјави дека бројот на загинатите е 73 лица, со повеќе од 4.000 повредени.

Најмалку 100 загинати во експлозијата во Бејрут

Либанскиот премиер Хасан Диаб изјави дека експлодирале 2.750 тони земјоделско ѓубриво амониум нитрат што со години се чувало во складиште во пристаништето, предизвикувајќи „целосна катастрофа“. Според АП, ова е најмоќната експлозија во градот, која претрпе граѓанска војна, судири со Израел и терористички напади.