Руте очекува со Трамп да се зголеми буџетот за одбраната во НАТО
Генералниот секретар на НАТО, Марк Руте, изрази очекување дека со новиот претседател, ќе се зголеми буџетот што земјите-членки го одвојуваат за одбраната, нешто на што Трамп инсистираше и во првиот мандат.
„Со враќањето на претседателот Трамп на функцијата, ќе ги зголемиме издатоците за одбрана и производството. Моите топли честитки до Доналд Трамп за неговата инаугурација како 47-ми претседател на САД и до Џеј Ди Венс како потпретседател“, порача генералниот секретар на НАТО Марк Руте.
„Најдобри желби“ до Трамп испрати и претседателката на Европската Комисија (ЕК), Урсула фон дер Лајен.
„ЕУ со нетрпение очекува тесна соработка со вас за справување со глобалните предизвици. Заедно, нашите општества можат да постигнат поголем просперитет и да ја зајакнат нашата заедничка безбедност. Ова е трајната сила на трансатлантското партнерство“, порача Фон дер Лајен.
Доналд Трамп и Џеј Ди Венс дадоа заклетва, по што новиот претседател го имаше и првото обраќање во кое порача дека сака да биде миротворец.
„Ќе го мериме нашиот успех не само со битките што ќе ги добиеме туку и по војните што ќе ги завршиме, а можеби и најважното – војните во кои нема никогаш да се вклучиме. Моето најгордо наследство ќе биде на миротворец и обединувач. Тоа сакам да бидам – миротворец и обединувач“, порача Трамп.
Денеска, 20 јануари, Трамп го започнува вториот мандат како претседател на САД. Првиот беше од 2017 до 2021.