Претседателот на Собранието на Црна Гора ја исклучи опозицијата од работата на Собранието на 15 дена

Претседателот на Собранието на Црна Гора, Андрија Мандиќ, на мнозинството пратеници од опозицијата им изрече 15 дена „мерка отстранување“ од Собранието поради, како што рече, континуираната блокада на законодавниот дом.


„Со ова се деблокира работата на Собранието по два месеци“, рече Мандиќ на седницата, која заврши по усвојувањето на дневниот ред на кој се најде буџетот за 2025 година.



Мерката не опфати само осум опозициски пратеници.


Еден од оние кои не беа казнети, пратеникот од опозицијата, Борис Мугоша, рече дека во Црна Гора се урива демократијата. 



Од средината на декември опозицијата го спречува одржувањето на собраниските седници бидејќи Уставната комисија на Собранието ја презеде надлежноста на Уставниот суд во постапката за пензионирање на судии од тој суд.



Ова, опозицијата го нарече обид за уставен удар.




Последна во низата седници што беа блокирани беше седницата на 21 јануари кога на дневен ред беше буџетот за 2025 година.



Претходно, покрај барањето за поништување на разрешувањето на судијата на Уставниот суд, опозицијата побара и гаранции дека Уставот во делот на идентитетските прашања и Законот за црногорско државјанство нема да се менува без консензус.



Претходно од партијата на поранешниот проруски Демократски фронт, предводена од претседателот на Собранието, Андрија Мандиќ, беше најавено дека ќе бараат промена на Уставот во однос на измените на официјалниот јазик и либерализација на стекнувањето црногорско државјанство. 



Барањето е српскиот да биде официјален јазик, со што ќе се изедначи со црногорскиот јазик, додека либерализацијата за добивање државјанство ќе им овозможи на граѓаните од соседните земји да станат црногорски државјани.



На ова, освен опозицијата, се спротивставија и албанските партии во Владата.



Премиерот Милојко Спајиќ рече дека за тоа ќе се одлучува со консензус на сите партии.



Одлуката на Собранието за престанок на мандатот на судијата на Уставниот суд предизвика загриженост кај Европската комисија кон средината на декември 2024. 



ЕУ ги повика сите институции во Црна Гора да ги почитуваат законите и Уставот на земјата бидејќи тоа е клучно за европскиот пат на Црна Гора.



Црна Гора е лидер во процесот на пристапување во ЕУ, со сите 33 поглавја од преговорите отворени и со шест затворени поглавја.