САД ги одложи царините за Мексико за еден месец

Соединетите Американски Држави(САД) за еден месец ги одложуваат претходно објавените царини од 25 отсто за увоз од Мексико, објавија американскиот претседател Доналд Трамп и претседателката на Мексико, Клаудија Шејнбаум, јави агенцијата ДПА.


Трамп објави дека разговарал со Шејнбаум и се согласиле да ги одложат царините кои требаше да стапат на сила на 4 февруари. 


Шејнбаум ја потврди информацијата за  одложувањето во објава на социјалната мрежа Икс (поранешен Твитер).




За време на едномесечната пауза, американскиот државен секретар Марко Рубио, секретарот за финансии Скот Бесент, секретарот за трговија Хауард Лутник и високи претставници на Мексико ќе се сретнат за да се обидат да ги решат проблемите.


„Очекувам да учествувам во тие преговори со претседателката Шејнбаум, имајќи предвид дека се обидуваме да постигнеме договор меѓу нашите земји“, напиша Трамп.


Трамп најави дека ќе воведе 25 отсто царини против Мексико за она што тој рече дека е одмазда за  „отворената граница" и нелегалното преминување на смртоносниот фентанил во САД.


Тој најави и царини за стоки од Канада и Кина.


Канада, Мексико и Кина се трите најголеми трговски партнери на САД и заедно сочинуваа повеќе од 40 отсто од американскиот увоз во 2024 година.