Нема договор за минималната плата

Без договор за минималната плата заврши седницата на Економско-социјалниот совет што се одржа во Владата на 3 февруари. Сепак, ќе има официјална потрошувачка кошница што ќе ја креираат синдикатите, Државниот завод за статистика, Организација на потрошувачи, како и министерствата за економија и за финансии.


„Телото кое ќе ја дефинира официјална потрошувачка кошница најверојатно ќе се формира на следната седница на Економско-социјалниот совет“, најави претседателката на Организацијата на работодавачи, Владанка Трајкоска.


Таа рече дека денеска дискутирале за минималната плата, но без ставови и заклучоци.


„Сите се стремиме кон ЕУ и она што го истражувавме беше дека ЕК нема директива за потрошувачката кошница. Секоја држава во регионот и ЕУ има и синдикална и кошница што ја формираат институциите и тие се разликуваат драстично, синдикалните се дури двапати поголеми. Тоа се политички одлуки и елементи кои ги користи Синдикатот за свои придобивки и тоа е нивен метод за вршење притисок“, изјави Трајкоска по седницата.




Претходно денеска, работодавачите истакнаа дека зголемувањето на минималната плата е можно доколку Владата субвенционира дел од придонесите.


Според претседателот на Сојузот на синдикати, Слободан Трендафилов, зголемувањето на минималната плата ќе ја елиминира сивата економија во делот на „платата во плико“ или „платата под маса“.


„Тоа ја чини касата близу 250 милиони евра“, рече тој.


Претседателот на Конфедерацијата на слободни синдикати, Благоја Ралповски потсети дека цените одат нагоре и како што рече, треба заеднички да се најде модул за тоа да се „заузда“.




Незадоволни од цените на производите во маркетите, граѓаните во петокот на 31 јануари одлучија да ги бојкотираат маркетите ширум државава. Граѓаните се организираа преку социјалните мрежи по примерот на Хрватска каде на 24 јануари почна акцијата против високите цени.


Минималната плата во Северна Македонија е 22.567 денари (367 евра).