Србија: Ректорскиот колегиум го одби повикот на Вучиќ за дијалог

Ректорскиот колегиум на Универзитетот во Белград го разгледал повикот за дијалог упатен од српскиот претседател Александар Вучиќ на 3 февруари 2025 година и, изразувајќи го единството на Универзитетот, донесел одлука да не го прифати повикот во вакви околности.


„Низата недоследности во јавните изјави на претставниците на државните органи не убедува дека дијалогот кој би довел до исполнување на студентските барања е можен, ниту пак дека е делотворен, доколку се организира меѓу две страни кои немаат мандат да расправаат за барањата и на кои тие барања не им се ниту упатени“, се наведува во соопштението.


Дополнително се истакнува дека „повикот за дијалог доаѓа во момент кога се прекршени сите морални и законски норми, во атмосфера на општа недоверба“.


„Како претставници на Универзитетот и академски граѓани, дополнително сме обесхрабрени од можноста за предложениот дијалог поради континуираните напади насочени против академската заедница во медиумскиот простор, како и сè побруталните, недозволиви физички напади во јавниот простор“, се додава во соопштението.




Универзитетот во Белград уште еднаш инсистира надлежните институции да ги исполнат студентските барања и потсетува дека дијалогот мора да се води во атмосфера на заемно уважување меѓу сите релевантни актери, со доверба во институциите и во рамките на нивните надлежности.


Ректорскиот колегиум се заблагодари за поканата и порача дека ги уверува „претседателот и јавноста дека сè додека работиме во согласност со доверените должности и во рамките на нашите надлежности и компетенции, работиме за доброто на универзитетската заедница, студентите и целокупното општество“.


Студентите блокираат повеќе од 60 факултети низ земјава, барајќи политичка и кривична одговорност за смртта на 15 лица во уривањето на бетонската настрешница на Железничката станица во Нови Сад на 1 ноември.


Студентите бараат објавување на комплетната документација за реконструкција на Железничката станица во Нови Сад. Тие бараат и да бидат казнети напаѓачите на демонстрантите кои ја следеа несреќата и да се прекине постапката против демонстрантите.


Власта, која ја отфрла одговорноста за несреќата, тврди дека се исполнети барањата на студентите кои академиците ги отфрлаат и продолжуваат со протестите.