Муртезани на средба со Кос – една од темите биле и уставните измени
Во фокусот на нивниот разговор биле реформите и Планот за раст на Западен Балкан, а се зборувало и за уставните измени, соопштија од Министерството за европски прашања (МЕП).
„Соговорниците разменија мислења и за уставните измени во контекст на предизвиците на европскиот пат. Тие констатираа дека добрососедските односи се од клучно значење за напредокот на интеграцијата на Северна Македонија во Европската Унија и дека сите решенија треба да бидат во согласност со волјата на граѓаните“, велат од МЕП.
Уставни измени со кои Бугарите ќе се внесат како една од заедниците во преамбулата на македонскиот Устав, е услов за Северна Македонија да ја одржи втората меѓувладина конференција со ЕУ и да ги отвори првите поглавја од преговорите.
Меѓутоа, ВМРО-ДПМНЕ, која формираше влада по изборите во мај заедно со коалицијата ВРЕДИ и партијата ЗНАМ, е на став за уставни измени со одложено дејство односно тие да важат од моментот на полноправно членство на земјава во ЕУ.
Муртезани, претходно во текот на денот од Брисел рече дека од бугарска страна има сигнали за подготвеност за дијалог. Како што пренесе државната агенција МИА, тој изјавил оти претставникот на Бугарија во Работната група за проширување на ЕУ му пренел оти Бугарија е подготвена за разговори.
„Мислам дека се создава добра средина, којашто мора да ја искористиме не само да воспоставиме дијалог, кој мора да го има помеѓу соседните земји за да се градат добрососедските односи, туку и простор што ќе нè води кон заедничко прифатливо решение, кое конечно ќе нè внесе во ЕУ“, изјави Муртезани.
Во последните четири години во Бугарија беа одржани седум парламентарни избори бидејќи ниту една партија не можеше да состави мнозинство за да се избере политичка влада. Меѓутоа, на 16 јануари бугарскиот парламент изгласа влада на чело со Росен Жељазков, а во која има претставници на партиите ГЕРБ-СДФ, БСП и „Има таков народ“ (ИТН).
Со средбата со Кос, Муртезани ја заокружи дводневната посета на Брисел. Од Министерството за европски прашања посочија дека тој го презентирал напредокот на земјата во спроведувањето на реформската агенда која е во рамки на Планот за раст.
Имплементацијата на овој план, според најавите од ресорното Министерство, ќе биде главна тема и на состанокот на лидерите од Западен Балкан што треба да се одржи во март во Скопје.